"ესენი შემოუერთდნენ ახალ ფორმატს" - თამარ ჩერგოლეიშვილი აქვეყნებს იმ პოლიტიკური ძალების სიას, რომლებიც ზურაბიშვილის ირგვლივ კოორდინაციას გეგმავენ
დღეს მე-5 პრეზიდენტმა სალომე ზურაბიშვილმა განაცხადა, ის კოორდინაცია, რომელიც თავისი წესებით გუშინ გამოცხადდა, დღეს შედგაო.
"მსურს, გაგაცნოთ ჩვენი პირველი შეხვედრის შესახებ. დღეს კოორდინაცია შედგა. ის კოორდინაცია, რომელიც თავისი წესებით გუშინ გამოცხადდა, რომ ჩვენ უნდა შევაჯეროთ პოზიციები იმ მთავარ გამოწვევებზე და საკითხებზე, რაც დღეს ქვეყანაში არსებობს. მსურს, ის შეჯერებული პოზიციები გაგაცნოთ, რაც არ გამორიცხავს იმას, რომ ინდივიდუალურმა პარტიებმა შემდგომ თავისი ხედვები წარადგინონ სხვანაირად, რაც ერთობლივად შეთანხმებული არ იქნება. ეს ასეთი ფორმის კოორდინაციაა, რომელიც დღეს იწყებს მუშაობას. უნდა ითქვას, რომ გუშინდელი პროტესტი ძალიან დიდი იმედს გვაძლევს და ადასტურებს იმას, რომ ხელისუფლების რეპრესიულმა პოლიტიკამ ვერ შეძლო და ვერ დაშალა ეს პროტესტი. ის არსებობს საზოგადოებაში და როდესაც ეძლევა საშუალება, რომ უფრო ძლიერად გამოჩნდეს, გამოჩნდება. ის არის მუდმივი და არაფერი და ვერავინ ვერ აშინებს მის მონაწილეებსა და საზოგადოებას", - თქვა მან. .
ამის შემდეგ "ფედერალისტების" ერთ-ერთმა ლიდერმა თამარ ჩერგოლეიშვილმა სოციალურ ქსელში გამოაქვეყნა სია იმ პოლიტიკური ძალების, რომლებიც, მისი თქმით, ზურაბიშვილთან ახალ ფორმატს შეუერთდნენ.
"ფედერალისტები,
გახარია,
ლელო,
დროა,
თავისუფლების მოედანი,
ევროპული საქართველო,
სტრატეგია აღმაშენებელი.
ესენი შემოუერთდნენ ახალ ფორმატს პრეზიდენტთან", - წერს ჩერგოლეიშვილი.