მემკვიდრეობითი ხელისუფლების ან მისი მცდელობის 10 მაგალითი | Allnews.Ge

ნიკარაგუას პრეზიდენტი დანიელ ორტეგა ნოემბერში მესამედ იყრის კენჭს საპრეზიდენტო არჩევნებზე საკუთარ მეუღლესთან ერთად, რომელიც მან ვიცე-პრეზიდენტის პოსტზე წარადგინა.

ქვეყნის პირველი ლედი როსარიო მურილიო პრეზიდენტის ყველაზე ახლო თანამოაზრედ ითვლება. ლათინურ ამერიკაში ხშირია შემთხვევები, როდესაც ექს-პრეზიდენტების მეუღლეები საპრეზიდენტო არჩევნებზე საკუთარ კანდიდატურებს აყენებენ. მაგრამ ასეთი მაგალითები მსოფლიოს სხვა რეგიონებშიც გვხვდება.

ჩვენ მოგვყავს ასეთი მემკვიდრეობითი ხელისუფლების ან მისი მცდელობის 10 მაგალითი ბოლო ათწლეულების მანძილზე.

აშშ-ს პრეზიდენტობის კანდიდატი, დემოკრატიული პარტიის წევრი ჰილარი კლინტონი საკუთარი მეუღლის ბილ კლინტონის კვალს მისდევს, რომელიც თეთრ სახლში 1993-2001 წლებში ცხოვრობდა.

კრისტინა ფერნანდეს დე კირშნერმა არგენტინის პრეზიდენტის პოსტზე საკუთარი მეუღლე ნესტორ კირშნერი 2007 წელს შეცვალა. ზოგიერთი მიმომხილველი აცხადებდა, რომ წყვილი აპირებდა რიგრიგობით დაიკავონ პრეზიდენტის პოსტი, მაგრამ 2010 წელს ნესტორ კირშნერი გარდაიცვალა.

30 წლით ადრე კი, 1974 წელს ისაბელ მარტინეზ დე პერონი არგენტინის პრეზიდენტი საკუთარი მეუღლის ხუან პერონის გარდაცვალების შემდეგ გახდა.

ფილიპინების ექს-პირველი ლედი იმელდა მარკოსი, რომლის მეუღლე - პრეზიდენტი ფერდინანდ მარკოსი - 1986 წელს 21-წლიანი მმართველობის შემდეგ გადააყენეს, კენჭს 1992 წლის საპრეზიდენტო არჩევნებზე იყრიდა, თუმცა მხოლოდ მეხუთე ადგილს დასჯერდა.

ჰონდურასის გადაყენებული პრეზიდენტის მანუელ სელაიას მეუღლემ სიომარა კასტრომ საკუთარი კანდიდატურა 2013 წლის არჩევნებზე წამოაყენა. მას ძალიან ცოტა ხმა დააკლდა კონსერვატიული პარტიის კანდიდატ ხუან ორლანდო ერნანდესზე გამარჯვებისთვის.

გვატემალის ექს-პრეზიდენტის ალვარო კოლომას მეუღლე სანდრა ტორესი ქმარს საპრეზიდენტო არჩევნებში მონაწილეობის მისაღებად გაეყარა, რადგან ქვეყნის კონსტიტუცია კრძალავს ახლო ნათესავების მიერ ერთმანეთის ცვლას ქვეყნის მეთაურის პოსტზე. მაგრამ არჩევნებში მან გამარჯვებას ვერ მიაღწია.

2007 წლის საფრანგეთის საპრეზიდენტო არჩევნებზე სოციალისტური პარტიის კანდიდატი სეგოლენ რუაიალი იყო, მაგრამ მას ნიკოლა სარკოზიმ აჯობა. 2011 წელს მან ისევ წამოაყენა საკუთარი კანდიდატურა, მაგრამ საკუთარ ექს-მეუღლესთან ფრანსუა ოლანდთან დამარცხდა. პრეზიდენტად არჩევის შემდეგ ოლანდმა რუაიალი ეკოლოგიისა და მდგრადი განვითარების მინისტრად დანიშნა.

ჯანეტ მუსევენი უგანდის პირველი ლედი 1986 წელს მისი მეუღლის იოვერი მუსევენის პრეზიდენტად არჩევის შემდეგ გახდა. 2006 წელს ის გახდა პარლამენტის წევრი, ცოტა ხნის წინ კი სპორტისა და განათლების მინისტრად დაინიშნა.

სამხრეთ აფრიკაში ნელსონ მანდელას ყოფილი ცოლი უინი არასდროს უმიზნებდა ქვეყნის მეთაურის თანამდებობას, მაგრამ მმართველი პარტიის ხელმძღვანელობაში ძალიან დიდი გავლენა ჰქონდა.