კოკა-კოლის საახალწლო სატვირთო მანქანა გაერთიანებულ სამეფოში სასურველი სტუმარი აღარ იქნება. მიუხედავად იმისა, რომ ბევრი ადამიანის თვალში კოკა-კოლას საახალწლო ილუმინაციებით მორთული სატვირთო შობისა და წლის უმთავრესი დღესასწაულის მოახლოების სიმბოლო გახდა, ლივერპულის ლიბერალურ-დემოკრატიული პარტია მიიჩნევს, რომ ამ წელს ტრადიცია უნდა დაირღვეს. პოლიტიკოსები ფიქრობენ, რომ კოკა-კოლას მანქანა ჭარბწონიანობის ეპიდემიურად გავრცელებას უწყობს ხელს. ლიბერალ-დემოკრატიული პარტიის ლიდერის რიჩარდ კემპის თქმით სატვირთოს ტრადიციად ჩამოყალიბებული მსვლელობა დღესასწაულის მომასწავებელი სულაც არ არის, არამედ ეს სარეკლამო მანევრია, რომელიც გამაგრილებელი სასმელის პოპულარიზაციას ეწევა, შედეგად კი არაჯანსაღი პროდუქციის მოხმარება იზრდება.

"მჯერა, რომ კოკა-კოლას ვიზიტი ამ წელს არ უნდა განხორციელდეს. ირგვლივ მიმოვიხედოთ და დავინახავთ, რომ ლივერპულში ჭარბწონიანობა ეპიდემიურად არის გავრცელებული. 11 წლის ბავშვების 30% ჭარბწონიანია, მაშინ როდესაც დაახლოებით 5%-ს უკვე კლინიკური ჭარბწონიანობა სჭირთ. ჩვენი მოზარდების 60%-ზე მეტი ებრძვის ჭარბწონიანობას - ჩვენ ყველა ღონე უნდა ვიხმაროთ პრობლემასთან საბრძოლველად რადგან შედეგი უკვე საგანგაშოა", - განაცხადა რიჩარდ კემპიმ. პოლიტიკოსის ინფორმაციით, სამედიცინო დაწესებულებებში ავადმყოფთა 10%-ს მეორე ტიპის დიაბეტი აწუხებს, უმეტეს შემთხვევაში კი მათი თავიდან არიდება შესაძლებელია, ადამიანების სწორად რომ იკვებებოდნენ და ფიზიკურ აქტივობას ცოტა დროს მაინც რომ უთმობდნენ.

პოლიტიკოსები ალტერნატიული გეგმის წარმოდგენას აპირებენ, რომელშიც პირველ რიგში ბავშვების ინტერესები იქნება გათვალისწინებული და მოწინავე ადგილზე დააყენებს ჯანმრთელობისა და ჯანსაღი ცხოვრების წესის პოპულარიზაციას.

აღნიშნულ საკითხს კოკა-კოლაც გამოეხმაურა და ხაზი გაუსვა იმ ფაქტს, რომ კომპანია უშაქრო გამაგრილებელ სასმელსაც აწარმოებს და ყიდის. გარდა ამისა კომპანიის წარმომადგენლებმა აღნიშნეს, რომ საახალწლო სატვირთო მანქანას ტურის ფარგლებში სხვადასხვა ქალაქსა და ქვეყანაში საშობაო განწყობა შეაქვთ და ლივერპულის ფაგლებშიც მათ ბევრი დადებითი გამოხმაურება აქვთ.