რას ამბობს თქვენი ჩაცმულობა თქვენზე | Allnews.Ge

სიახლე ნამდვილად არ არის, რომ თქვენი გარდერობი თქვენზე ბევრ რამე ამბობს.

ის თუ რა გაცვიათ, უბრალო გამვლელებს მიახვედრებს, სად მუშაობთ, რას გრძნობთ, როგორი ამბიციები და ჩვევები გაქვთ.

კლინიკურმა ფსიქოლოგმა ჯენიფერ ბაუმგარტნერმა ტანსაცმლის ადამიანის თვითგამოხატვის საშუალებად გამოყენების შესახებ წიგნი დაწერა, სადაც ახსნა, არა მხოლოდ ის, თუ როგორ განსაზღვრავს თქვენი ფსიქოლოგიური მდგომარეობა ტანსაცმლის შერჩევის პროცესს, არამედ ისიც, თუ როგორ დავძლიოთ ძირითადი ფსიქოლოგიური პრობლემები, რომლებიც, შესაძლოა, თქვენმა გარდებრობმა სააშკარაოზე გამოიტანოს, როგორც თქვენს ყოველდღიურ ცხოვრებაში, ასევე სამსახურში.

"შოპინგისა და ფულის ხარჯვის განწყობა ისეთ შინაგან მოტივაციაზეა დამოკიდებული, როგორიც ემოცია, გამოცდილება და კულტურაა", - ამბობს ექიმი ბაუმგარტნერი და აღნიშნავს, რომ შოპინგის დროს ადამიანის მიერ გამოვლენილ ნებისმიერ ჩვევას გაცილებით ღრმად აქვს ფესვები გადგმული: "მე ვიკვლევ ამ ღრმა მნიშვნელობას, ისევე როგორც ამას თერაპიის დროს ვაკეთებ" - აღნიშნავს ექიმი.

"ფორბსი" დაინტერესდა, რატომ ააშკარავებს ტანისამოსი ადამიანის პიროვნებასა და ჩვევებს, რა შეტყობინებას უგზავნის გარშემომყოფებს და როგორ გამოვიყენოთ ჩვენი გარდერობი სხვა ადამიანების დამოკიდებულების შესაცვლელად.

როგორ ვიყენებთ ტანსაცმელს როგორც იარაღს?

ამერიკელები ტანსაცმელს იყენებენ, როგორც ეკონომიკურ და სოციალურ მაჩვენებელს, იმიტომ რომ საზოგადოება დიდი ხანია აღარაა დაყოფილი კასტებად და ფენებად.

"როდესაც არ არსებობს რაიმე კონკრეტული სისტემა, ადამიანები მას თავისით ქმნიან, ეს მათ ეხმარება იმის დასადგენად, თუ რომელ ფენასა და ადგილს განეკუთვნებიან საზოგადოებაში. განსაკუთრებით ამ ეკონომიკური ვითარების პირობებში, მაშინ, როდესაც ადამიანები კარგავენ სტატუსს, იმის განსაზღვრა, თუ ვინ ვართ ჩვენ და საზოგადოების რომელ კატეგორიას ვეკუთვნით, ძალიან მნიშვნელოვანია. ჩვენი ტანსაცმელი კი იმ ადგილის დამკვიდრებაში გვეხმარება, რომელიც მიგვაჩვნია, რომ ჩვენთვისაა განკუთვნილი" - განმარტა ფსიქოლოგმა.

მან ამერიკული ტელესერიალის "ნამდვილი დიასახლისების" მაგალითი მოიყვანა: "ნახეთ როგორ არიან ორიენტირებულები ფულზე. დაპირისპირებისას ლოგოებსა და დიზაინერებს იყენებენ ერთმანეთის დასამცირებლად. იყენებენ ტანსაცმელსა და აქსესუარებს, როგორც იარაღს, რათა საზოგადოებაში კუთვნილი ადგილი დაიმკვიდრონ და ეს რეალურ ცხოვრებაშიც ასე ხდება" - აღნიშნა ჯენიფერ ბაუმგარტნერმა.

ტანსაცმელი კარგი ან ცუდი იმიჯის შესაქმნელად

"ოდესმე გსმენიათ, რომ მამაკაცის შეფასება მისი ფეხსაცმლით შეგიძლიათ? -სამწუხაროდ საქმე ასე მარტივადაც არაა"- გვეუბნება ფსიქოლოგი და განმარტავს, რომ არ არის რაიმე კონკრეტული ტანსაცმელი ან სტილი, რომელიც ადამიანს წარმატებულ იმიჯს შეუქმნის. "თუმცა, რა თქმა უნდა, არის საბაზისო წესები, რაც პოზიტიურ იერს გვაძლევს, მაგალითად პატარა შავი კაბა, პიჯაკი ... კლასიკური ტანსაცმელი დიდი ხანია აპრობირებულია და უკვე ვიცით, რომ მუშაობს, თანაც კლასიკური ტანსაცმელი, არ აქვს მნიშვნელობა ასაკს, სქესსა და წარმომავლობას, ყველა შემთხვევაში ერთნაირად ეფექტურია"- ამბობს ფსიქოლოგი.

ფსიქოლოგის განმარტებით, არ არსებობს ტანსაცმლის რაიმე კონკრეული სახოება, რომელიც ჩვენს წარუმატებლობაზე მიანიშნებს. ყველაზე ცუდი ჩაცმულობა არის ის, რომელიც ცდილობს დამალოს და იგნორირება გაუკეთოს იმას, თუ ვინ ვართ და სად ვართ, ან ის ტანსაცმელი, რომელიც აღნაგობის, ასაკისა და სიტუაციის გაუთვალისწინებლად არის შერჩეული.

რას გეუბნებათ ტანსაცმელი თქვენ და არა რას ამბობს ტანსაცმელზე თქვენზე.

ჩრდილოდასავლეთის უნივერსიტეტის მკვლევარებმა თავის ნაშრომში განსაზღვრეს თუ რა სისტემურ გავლენას ახდენს ტანსაცმელი მათი მფლობელის ფსიქოლოგიურ პროცესზე, და როგორ შეუძლიათ მათ თავი გაგრძნობინონ.

მკვლევარებმა ცდაში მონაწილე ადამიანებს თეთრი ხალათები მისცეს და ზოგიერთ მათგანს უთხრეს, რომ ეს ექიმის ხალათი იყო, ნაწილს კი უთხრეს, რომ მხატვრის ხალათს ატარებდნენ. აღმოჩნდა, რომ ისინი, ვისაც ექიმის ხალათი ეცვა გაცილებით უფრო ყურადღებით და ფრთხილად იქცეოდნენ, მათი ქმედება განაპირობა მათმა ტანსაცმელმა.