წერილების ბოთლით გაგზავნის იდეის ავტორად ბერძენი ფილოსოფოსი თეოფრასტი ითვლება. ჩვ. წ. აღ-მდე IV საუკუნეში, თეოფრასტიმ ხმელთაშუა ზღვაში წყლის მიმოქცევაზე დაკვირვების მიზნით დაიწყო ბოთლით წერილების გაგზავნა.

1914 წელს, შოტლანდიელმა კაპიტანმა ბრაუნმა ზღვაში ბოთლით წერილი გადაადგო. წერილში კაპიტანი ბრაუნი 6 პენსს ჰპირდებოდა მას, ვინც ამ გზავნილს მიიღებდა. 97 წლის შემდეგ წერილი შოტლანდიური გემის Copious-ის ეკიპაჟმა იპოვა, მაგრამ, რა თქმა უნდა, ამ დროისთვის კაპიტანი ბრაუნი უკვე დიდი ხნის გარდაცვლილი იყო.

თუმცა, ძალიან გაუმართალათ მიგრანტებს ეკვადორიდან და პერუდან. ეს ამბავი 2005 წელს მოხდა, როდესაც 80-ზე მეტი ადამიანი ძველი გემით ცდილობდა აშშ-ის ნაპირებამდე მიღწევას. მიგრანტები მოულოდნელად შტორმში აღმოჩნდნენ და სასოწარკვეთილებმა ზღვაში ბოთლით წერილი გადაადგეს, სადაც დახმარებას ითხოვდნენ. წერილი კოსტა-რიკელმა მეთევზემ იპოვა და გემიც და მასზე მყოფი ადამიანებიც გადაარჩინეს.

ამერიკელმა პასტორმა ჯორჯ ფილიპსმა გადაწყვიტა ალკოჰოლიზმის წინააღმდეგ ბოთლის ფოსტის საშუალებით ებრძოლა. ის აგროვებდა ალკოჰოლის ცარიელ ბოთლებს, ათავსებდა იქ საკუთარ ქადაგებებს და შემდეგ Puget Sound-ის ყურეში აგდებდა, სადაც წყლის მიმოქცევა ძლიერია. მალევე პასტორს წერილები მიუვიდა. ეს წერილები იმ ადამიანების გამოგზავნილი იყო, ვინც პასტორის გზავნილები იპოვა. ზოგიერთი წერდა კიდეც, რომ პასტორის ეს უჩვეულო ქადაგება მათ დამღუპველი დამოკიდებულებისგან გათავისუფლებაში დაეხმარა.

1784 წელს იაპონელი განძის მაძიებელი მაცუიამა, განძის ძიებისას, მეგობრებთან ერთად შტორმში მოყვა და უკაცრიელ კუნძულზე აღმოჩნდა. მაცუიამამ, გაიაზრა რომ დაღუპვისთვის იყო განწირული და ბოთლით წერილი გააგზავნა, იმ იმედით, რომ მის ტრაგიკულ ბედზე საკუთარ იაპონურ სოფელში გაიგებდნენ. საინტერესო ისაა, რომ ბოთლი ზუსტად მისი სოფლის სანაპიროებთან ახლოს გამორიყა წყალმა, მაგრამ ეს მოხდა მხოლოდ 134 წლის შემდეგ.

გერმანელი რიჩარდ პლატცი გემის დაღუპვის მსხვერპლი სულაც არ ყოფილა. მან უბრალოდ გადაწყვიტა შეემოწმებინა, რამდენად შორს შეიძლებოდა "გაეცურა" მის მიერ გადაგდებულ ბოთლს, სადაც ორი მარკა ჩადო, რომელზეც ბერლინში მისი სახლის მისამართი იყო მითითებული. წერილმა მითითებულ მისამართზე მართლაც მიაღწია, მაგრამ მხოლოდ 2014 წელს, რომელიც რიჩარდ პლატცის შვილთაშვილს გადასცეს.

ამერიკელი მკვლევარი დინ ბამპუსი ბოთლით წერილებს ოკეანეების დინების გამოკვლევის მიზნით აგზავნიდა. 1956 წლიდან 1972 წლამდე მას დაახლოებით 300 000 წერილი ჰქონდა გაგზავნილი და პასუხები მხოლოდ ნაწილზე, დაახლოებით ერთ მეათედზე დაუბრუნდა.

მეზღვაური ჯეიმს გლიზონი ბოთლით გაგზავნილი წერილის საშუალებით ცდილობდა თავისი მეორე ნახევრის პოვნას. 1859 წელს მან ატლანტიკის ოკენაში გააგზავნა წერილი, სადაც საკუთარ ხელს და გულს სთავაზობდა ისეთ ქალს, რომელიც "არ ბუზღუნებდა და კარგად საუბრობდა". წერილი 1956 წელს, ირლანდიური პორტ კუინსტაუნის მახლობლად იპოვეს. გლიზონის მოძებნის მცდელობა წარუმატებლად დამთავრდა, რადგან გლიზონი საკუთარ გემ "ვიქტორიასთან" ერთად 1900 წელს დაიღუპა, ისე რომ დაოჯახება მაინც ვერ მოასწრო.