თსუ-ში აქცია გრძელდება - გიორგი გაფრინდაშვილი რექტორ ლადო პაპავას გადადგომისკენ მოუწოდებს | Allnews.Ge

გიორგი გაფრინდაშვილი, რომელმაც თსუ-ს კანცლერობის თანამდებობიდან საკუთარი კანდიდატურა მოხსნა, უნივერსიტეტის რექტორ ლადო პაპავას გადადგომისკენ მოუწოდებს.

აღნიშნულთან დაკავშირებით გაფრინდაშვილი განცხადებას სოციალური ქსელით ავრცელებს, რომელშიც განმარტავს, რომ პაპავამ, როგორც უნივერსიტეტის პირველმა პირმა, სიტუაციის ნორმალიზების, სამართლებრივ ჩარჩოებში მოქცევისა და დაძაბულობის თავიდან აცილებისათვის არცერთი ქმედითი ნაბიჯი არ გადადგა, რის გამოც ბოლო დღეებში განვითარებულ მოვლენებზე პასუხისმგებლობა მან უნდა აიღოს.

"ვითვალისწინებ რა დღეს ივანე ჯავახიშვილის სახელობის თბილისის სახელმწიფო უნივერსიტეტში განვითარებულ მოვლენებს და ასევე საქართველოს პრემიერ-მინისტრის მოწოდებას, სტუდენტების გახლეჩის და მოსალოდნელი დაპირისპირების თავიდან აცილების მიზნით, ვხსნი ჩემს კანდიდატურას. ამასთან ერთად ვაცხადებ, რომ ჩემ წინააღმდეგ წამოყენებული ყველა ბრალდება იყო იმ ბინძური კამპანიის ნაწილი, რომელიც დაიწყო რამდენიმე დღის წინ და ემსახურებოდა ჩემი, როგორც კანცლერობის კანდიდატის დისკრედიტაციას, მზად ვარ პასუხი გავცე ჩემი წარსულის შესახებ ნებისმიერ კითხვას. კიდევ ერთხელ მადლობა მინდა გადავუხადო ჩემს მხარდამჭერებს აკადემიურ საბჭოში ნდობისათვის, თითოეულ სტუდენტს, ადმინისტრაციის თანამშრომელსა და პროფესორ-მასწავლებლებს თანადგომისათვის და ბოდიში მოვუხადო მათ ჩემი ამ გადაწყვეტილების გამო.

ბოლო დროს უნივერსიტეტში განვითარებული მოვლენები, რომლებმაც საფრთხის ქვეშ დააყენა უმაღლესი სასწავლებლის ნორმალური ფუნქციონირება და გამოიწვია სტუდენტების დაპირისპირება მართული იყო იმ ძალების მიერ, რომლებიც ცდილობდნენ კანონის სრული დაცვით არჩეული კანცლერობის კანდიდატის დისკრედიტირებას და უნივერსიტეტის გახლეჩას.

ვთვლი, რომ ყოველივე ზემოაღნიშნულთან დაკავშირებით პასუხისმგებლობა თავის თავზე უნდა აიღოს უნივერსიტეტის რექტორმა, რადგან მან, როგორც უნივერსიტეტის პირველმა პირმა, არც ერთი ქმედითი ნაბიჯი არ გადადგა მიმდინარე დღეებში სიტუაციის ნორმალიზების, სამართლებრივ ჩარჩოებში მოქცევისა და დაძაბულობის თავიდან აცილებისათვის... რექტორის მხრიდან პასუხისმგებლობის თავზე აღება არ მინდა ორაზროვნად იქნას აღქმული. ამიტომ განვმარტავ - იგი უნდა გადადგეს დაკავებული თანამდებობიდან," - აცხადებს გაფრინდაშვილი.

გიორგი გაფრინდაშვილმა თსუ-ს კანცლერის თანამდებობიდან საკუთარი კანდიდატურა გუშინ მოხსნა, თუმცა ამის მიუხედავად მის წინააღმდეგ საპროტესტოდ განწყობილი სტუდენტები აქციების შეწყვეტას არ აპირებენ და უნივერსიტეტის ხელმძღვანელობას სხვა მოთხოვნებით მიმართავენ, მათ შორის ისინი თსუ-ში "ოდეერის" ინსტიტუტის არსებობის შესახებ ინფორმაციასთან დაკავშირებით გამოძიების ჩატარებას და თვითმმართველობის რეორგანიზებას მოითხოვენ.

რაც შეეხება თსუ-ის რექტორის, ვლადიმერ პაპავას იმპიჩმენტის საკითხს, იგი უნივერსიტეტის აკადემიურმა საბჭომ არ განიხილა.

როგორც გუშინ, სხდომის დასრულების შემდეგ ჟურნალისტებს სამართლის დოქტორმა, ავთანდილ კახნიაშვილმა განუცხადა, ამ ეტაპზე დღის წესრიგში ვერ დადგება ვლადიმერ პაპავას იმპიჩმენტის საკითხი, რადგან ეს ისედაც რთულ მდგომარეობაში მყოფ უნივერსიტეტს მდგომარეობას კიდევ უფრო მეტად დაუმძიმებს. კახნიაშვილი აკადემიურ საბჭოსა და სტუდენტებს შორის შუამავლის როლს ასრულებს და ამ სტატუსით ის საბჭოს სხდომას ესწრებოდა.

ავთანდილ კახნიაშვილმა დაპირისპირებულ სტუდენტებს დიალოგისკენ მოუწოდა და აღნიშნა, რომ ვლადიმერ პაპავა მზად არის ერთობლივად შეხვდეს სტუდენტების ორივე ჯგუფის წარმომადგენლებს და უნივერსიტეტის წინაშე მდგარი პრობლემების გადაჭრის გზები მათთან ერთად განიხილოს. კახნიაშვილის განცხადებით, ამ ეტაპზე მხოლოდ კანცლერის არჩევნებია აქტუალური, სადაც სტუდენტების აქტიური ჩართულობა გახდება საჭირო, რომ ერთობლივი ძალებით მოხდეს ღირსეული კანდიდატის შერჩევა.