რომელი დაავადებებისგან უნდა დავიცვათ ბავშვები ზაფხულში | Allnews.Ge

მართალია ბავშვებში სხვადასხვა დაავადებები ზამთრის სეზონზე უფრო აქტიურად იჩენს ხოლმე თავს, თუმცა ზაფხულის ცხელ პერიოდს თავისი დაავადებები ახასიათებს.

კონკრეტულად რომელი დაავადებები ვრცელდება ზაფხულში და როგორ დავიცვათ ამისგან ბავშვები, Allnews.ge ბავშვთა ინფექციური კლინიკის ექიმ-რეანიმატოლოგს, თინათინ ქორიძეს ესაუბრა.

"ზაფხულში ბავშვებში ყველაზე ხშირად კუჭ-ნაწლავის ინფექციური დაავადებებია გავრცელებული, რომელსაც იწვევს დაუბანელი, ჭუჭყიანი ხელები. ამას გარდა, ზაფხულში ხშირია საკვებით გამოწვეული ინტოქსიკაციები, რასაც იწვევს არასწორად დამზადებული და შენახული საკვები, სწორედ ეს ხდება ინტოქსიკაციის მიზეზი.

ზაფხულში რამდენიმე საათით, გარეთ დატოვებული საკვებიც კი საშიში ხდება ორგანიზმისთვის, როგორც დიდისთვის, ისე პატარასთვის, განსაკუთრებით რძის პროდუქტები, რომელიც მალფუჭებადია და ამ დროს ბაქტერიების გამრავლების რისკი მაღალია", - ამბობს თინათინ ქორიძე.

ექიმის რჩევით, აუცილებელია, ზაფხულში ხშირად დავბანოთ პატარებს ხელები, ასევე სადილი მოვამზადოთ სანიტარული ნორმების დაცვით და შევინახოთ გრილ ადგილზე.

ზაფხულში კიდევ ერთი პრობლემა მწერის ნაკბენია, როგორც ექიმი ამბობს, ნაკბენს ყველაზე რთულ შემთხვევაში მხოლოდ ალერგიული რეაქციის გამოწვევა შეუძლია.

"ჩვენთან ძალიან იშვიათია საშიში მწერები, რომლებსაც შეუძლიათ სიცოცხლისთვის საშიში დაავადების გამოწვევა.

მწერების ნაკბენს უნდა ვერიდოთ იმ თვალსაზრისით, რომ შეიძლება გამოიწვიოს ადგილობრივი ალერგიული რეაქცია - სიწითლე, გამონაყარი და ა.შ.".

რაც შეეხება ასაკს, როგორც ექიმი ამბობს, ბავშვების ასაკი შეუზღუდავია და ზემოთაღნიშნულმა ინფექციურმა დაავადებებმა შესაძლოა შეაწუხოს როგორც 1 წლამდე პატარები, ისე დიდები.

"ზაფხულში მომართვიანობაზე ასაკი შეუზღუდავია, შეიძლება ერთ წლამდე ასაკის ბავშვებშიც ისევე განვითარდეს კუჭ-ნაწლავის ინფექციური დაავადებები, როგორც შედარებით მოზრდილებში. წლამდე ბავშვებში ასეთი დაავადებების გავრცელების მიზეზი მშობლისა და მომვლელის მიერ ჰიგიენური რეჟიმის დარღვევაა", - ამბობს თინათინ ქორიძე.

თეა ბეჟიტაშვილი