10 დღის განმავლობაში თბილისში ხეების მოჭრაზე მორატორიუმი გამოცხადდა, - ამის შესახებ ჟურნალისტებს თბილისის მერმა დავით ნარმანიამ კრწანისის რაიონში განუცხადა. მან კომენტარი ყაზბეგის გამზირზე ხეების მოჭრის საკითხზე გააკეთა.

დავით ნარმანიას თქმით, გუშინ მიიღო მნიშვნელოვანი გადაწყვეტილება, რაც გულისხმობს შემდეგი 10 დღის განმავლობაში ქალაქში ხეების მოჭრაზე მორატორიუმის გამოცხადებას.

ნარმანიას თქმით, ამ 10 დღის განმავლობაში ნებისმიერ დაინტერესებულ საზოგადოებრივ ორგანიზაციასთან ან პირთან ერთად მერია იმსჯელებს და გადახედავს გამწვანებასთან დაკავშირებულ წესებს დედაქალაქში.

"მართალია, ჩვენ გარკვეული პერიოდის წინ გარკვეული ცვლილებები შევიტანეთ და გავამკაცრეთ წესები, თუმცა როგორც ჩანს, ეს საკითხი კიდევ გადასახედია, ამიტომ ყველა დაინტერესებულ პირთან ერთად მზად ვართ დავსხდეთ და განვახორციელოთ ეს საკითხები, რათა რეგულაციები კიდევ უფრო მეტად მკაცრი გავხადოთ. თუმცა ამავდროულად უნდა გავითვალისწინოთ, რომ 21-ე საუკუნეში ურბანიზაცია შეუქცევადი პროცესია, ამიტომაც უნდა მივიღოთ ისეთი რეგულაცია, რაც საჯარო და კერძო ინტერესების თანხვედრით მოგვცემს ქალაქის შემდგომი განვითარების შესაძლებლობას. მოგვცემს იმის შესაძლებლობას, რომ ერთი მხრივ, მწვანე საფარიც შევინარჩუნოთ და მეორე მხრივ, ვიზრუნოთ იმაზე, რომ ქალაქში ახალი პროექტები განხორციელდეს. ადამიანები დასაქმდნენ. ასე, რომ ნებისმიერი ადამიანი, რომელსაც რაციონალური წინადადება გააჩნია, ჩვენ მზად ვართ, რომ შევხვდეთ ამ ადამიანებს და შევივიმუშაოთ ახალი წინადადებები", - განაცხადა ნარმანიამ.

თბილისის პროკურატურამ ყაზბეგის გამზირზე ხეების მოჭრის საქმეზე გამოძიება დაიწყო.