აპლიკანტთა დაახლოებით 80% ვერ აკმაყოფილებს მასწავლებლის პროფესიული სტანდარტით დადგენილ მოთხოვნებს, - ამის შესახებ შეფასებისა და გამოცდების ეროვნული ცენტრის ხელმძღვანელმა, მაია მიმინოშვილმა, "ინტერპრესნიუსთან" ინტერვიუში განაცხადა. როგორც მიმინოშვილმა აღნიშნა, გამოცდაზე გასულთაგან რამდენი იყო მოქმედი პედაგოგი და რამდენი პედაგოგობის მსურველი, ამ სტატისტიკას გამოცდების ცენტრი არ ფლობს.

"სურათი, რა თქმა უნდა, რბილად რომ ვთქვათ, არასახარბიელოა - აპლიკანტთა დაახლოებით 80 % ვერ აკმაყოფილებს მასწავლებლის პროფესიული სტანდარტით დადგენილ მოთხოვნებს. მასწავლებლის პროფესიული სტანდარტი ეს ის დოკუმენტი გახლავთ, რომელსაც ქმნის მასწავლებელთა პროფესიული განვითარების ცენტრი და ამტკიცებს განათლებისა და მეცნიერების სამინისტრო. მასში ნათლად და მკაფიოდ არის გაწერილი, რა კომპეტენციებს უნდა ფლობდეს კონკრეტული საგნის მასწავლებელი. სწორედ ამ დოკუმენტით ვხელმძღვანელობთ ჩვენ შეფასების ინსტრუმენტის მომზადებისას და ბუნებრივია, ტესტური დავალებებიც იქმნება სტანდარტის შესაბამისად. ასეთ შემთხვევაში, ჩვენ უფლება არ გვაქვს აპლიკანტს მოვთხოვოთ ის, რაც სტანდარტით არ არის გათვალისწინებული", - განაცახდა მიმინოშვილმა.

მისივე თქმით, იგი წინააღმდეგია გამოცდების შედეგების საფუძველზე იმსჯელოს მოქმედი პედაგოგების მომზადების დონეზე:

"1. 2010 წლიდან დაწყებული მოქმედ პედაგოგთა მნიშვნელოვანმა ნაწილმა უკვე წარმატებით დაადასტურა საკუთარი კომპეტენცია; 2. ჩვენ არ ვიცით აპლიკანტებიდან რამდენია მოქმედი და მსურველი; 3. წელს პირველად იღებდნენ მონაწილეობას ეთნიკური უმცირესობები. მე პირადად გამოცდების შედეგების ამ კუთხით გაანალიზებაც საინტერესო მგონია. მაგალითად, რამდენად ხელმისაწვდომი არის მათთვის პროფესიული განვითარების აქტივობები, როგორ აისახება ამ აქტივობებში ჩართულობა მათ შედეგებზე და ა. შ . მაგრამ ამ კითხვებზე პასუხის გაცემა სასერტიფიკაციო გამოცდების ფუნქცია არ არის".

მიმინოშვილმა მასწავლებელთა სასერტიფიკაციო გამოცდების მოთხოვნების შესახებაც ისაუბრა და აღნიშნა, რომ თუ აპლიკანტთა 70-80%-სთვის ბარიერის გადალახვა პრობლემა აღმოჩნდა, პირველი, რაც უნდა შემოწმდეს, არის სტანდარტში გაწერილი მოთხოვნები:

"ხომ არ უყენებს სტანდარტი ძალიან მაღალ მოთხოვნებს აპლიკანტებს? თუ ეს ასე არ არის, მაშინ უნდა შევამოწმოთ შეფასების ინსტრუმენტი - ხომ არ ვაფასებთ იმას, რაც სტანდარტით არ არის განსაზღვრული? მხოლოდ ამის შემდეგ შეგვიძლია გამოვიტანოთ კონკრეტული დასკვნა. მეორე ნაწილის შემოწმება ძალიან მარტივია, იმდენად, რამდენადაც ყოველი გამოცდის შემდეგ ჩვენ ვაქვეყნებთ საგამოცდო ტესტებს, რაც ყველასთვის ხელმისაწვდომია. ამ წლების განმავლობაში არც ერთი შენიშვნა არ მიგვიღია იმის თაობაზე, რომ რომელიმე დავალება არ შეესაბამება არსებულ სტანდარტს. ამ საკითხებზე მსჯელობისას, არ უნდა დაგვავიწყდეს ის, რომ ჩვენი მთავარი მიზანია, მოსწავლეებს ხარისხიანი განათლება შევთავაზოთ", - აღნიშნა მიმინოშვილმა "ინტერპრესნიუსთან" ინტერვიუში.