სოციალურ ქსელში სოსო ჯოხაძის მკვლელობის ამსახველი კადრები ვრცელდება. კადრები, ვაკეში, რიგისა და ფალიაშვილის ქუჩების კვეთაზე, სათვალთვალო კამერამ დააფიქსირა.

კადრებში ჩანს, როგორ გადაკვეთა შავმა ავტომობილმა შუქნიშანი, მიუახლოვდა მას მამაკაცი, რომელმაც რამდენჯერმე გაისროლა, ხოლო შემდეგ მანქანას მძღოლის მხრიდან მიუახლოვდა და კიდევ რამდენიმე საკონტროლო გასროლა განახორციელა. კადრები მძიმე სანახავია და სუსტი გულის მქონე ადამიანებმა მისი ნახვისგან თავი შეიკავეთ.

შსს-ს თბილისის პოლიციის დეპარტამენტის დეტექტივების სამმართველოს და ვაკე-საბურთალოს სამმართველოს თანამშრომლებმა, ცხელ კვალზე ერთობლივად ჩატარებული ოპერატიულ-სამძებრო და საგამოძიებო ღონისძიებების შედეგად, 1981 წელს დაბადებული ბ.ნ. განზრახ მკვლელობისა და ცეცხლსასროლი იარაღის მართლსაწინააღმდეგო შეძენა-შენახვა-ტარების ბრალდებით დააკავეს.

შსს-ს ინფორმაციით, გამოძიებამ დაადგინა, რომ ბრალდებულმა მიმდინარე წლის 2 სექტემბერს, თბილისში, ვაკის რაიონში, ცეცხლსასროლი იარაღიდან გასროლით მრავლობითი ჭრილობა მიაყენა 1979 წელს დაბადებულ ს.ჯ.-ს და 1982 წელს დაბადებულ ზ.ჩ-ს. ბრალდებული შემთხვევის ადგილიდან მიიმალა. ერთი დაჭრილი ადგილზე გარდაიცვალა, ხოლო მეორე - გადაყვანილია საავადმყოფოში.

"სამართალდამცველებმა ბრალდებული ცხელ კვალზე, თბილისში დააკავეს. პოლიციამ დანაშაულის ჩადენის იარაღი ნივთმტკიცებად ამოიღო. გამოძიება განზრახ მკვლელობის და იარაღის მართლსაწინააღმდეგო შეძენა-შენახვა-ტარების ფაქტზე მიმდინარეობს (საქართველოს სსკ-ის 108-ე და 236-ე მუხლებით)", - ნათქვამია შსს-ს ინფორმაციაში.