ვაკეში 2 სექტემბერს მომხდარი სროლის დროს დაჭრილი ადვოკატი ზაქარია ჩიბუხაშვილი საავადმყოფოდან გაწერეს. ამის შესახებ თავად ზაქარია ჩუბუხაშვილმა განაცხადა. ადვოკატის ინფორმაციით, მისი ჯანმრთელობის მდგომარეობა ბოლო სამი დღის განმავლობაში გაუმჯობესდა, რის შედეგადაც ის უკვე სახლში გაწერეს.

"სამი დღეა რაც შედარებით კარგად ვარ. დღეს გამომწერეს საავადმყოფოდან სახლში. ჯერჯერობით ნორმალურად მიმდინარეობს ჩემი გამოჯანმრთელების პროცესი. ღვთისწყალობით გადავრჩი", - განაცხადა ჩიბუხაშვილმა.

მისივე ინფორმაციით, ვაკეში მომხდარი მკვლელობის შესახებ სამართალდამცველებს ჯერჯერობით არ დაუკითხავთ.

"გამომძიებლებს ჯერ არ დავუკითხივარ, რადგან ძალიან ცუდად ვიყავი", - აღნიშნა ჩიბუხაშვილმა.

ადვოკატი ამ ეტაპზე ვაკეში მომხდარი შემთხვევის დეტალებზე საუბრისგანაც თავს იკავებს და აღნიშნავს, რომ ამ საკითხზე ის რამდენიმე დღეში გააკეთებს კომენტარს.

2 სექტემბერს, ვაკეში მომხდარი სროლის დროს სოსო ჯოხაძე მოკლეს, მასთან ერთად მანქანაში მყოფი ადვოკატი ზაქარია ჩიბუხაშვილი კი დაჭრეს. აღნიშნულ საქმეზე პოლიციამ განზრახ მკვლელობისა და იარაღის მართლსაწინააღმდეგო შეძენა-შენახვა-ტარების ბრალდებით ბადრი ნათობაძე დააკავა. მას სასამართლომ აღკვეთის ღონისძიების სახით პატიმრობა შეუფარდა.

აღნიშნულ საქმეზე, შსს-მ დანაშაულის შეუტყობინებლობის ბრალდებით სამი პირი 8 სექტემბერს დააკავა.