გორის მაჟორიტარი დეპუტატობის კანდიდატის ირაკლი ოქრუაშვილის საარჩევნო შეხვედრისას დაჭრილი ორი პირი კვლავ სტაციონარში რჩება. თომაშვილის და კოშაძის ჯანმრთელობის მდგომარეობა სტაბილურია. თავდაცვის სამინისტროს გორის სამხედრო ჰისპიტალის ექიმ-ტრავმატოლოგის გიორგი არევაძის განცხადებით, ორივე მათგანს გუშინ გვიან საღამოს ჩაუტარდა ქირურგიული ოპერაცია. ექიმის განცხადებით, თომაშვილს წვივის არეში აღენიშნება ცეცხნასროლი დაზიანება, ხოლო კოშაძეს წინა მხრის არეში აქვს მიყენებული ჭრილობა.

"ორივე მათგანის ჯანმრთელობის მდგომარეობა სტაბილურია, თუმცა მკურნალობას აგრძელებენ და კვლავ სტაციონარში რჩებიან", - აცხადებს ჰოსპიტალის ექიმი გიორგი არევაძე.

მომხდარ ფაქტთან დაკავშირებით გამოძიება კვლავ 117-ე და 236-ე მუხლებით მიმდინარეობს.

ირაკლი ოქრუაშვილი გორში ე.წ. კრიმინალური ავტორიტეტების გააქტიურებაში კახი კალაძის ცოლის ძმას ადანაშაულებს.

"დილიდან, საარჩევნო რეჟიმში ვაწარმოებდით შეხვედრებს ჩვენს აქტივისტებთან ერთად, გორის ერთ-ერთ უბანში. "ქართული ოცნების" ერთ-ერთი კოორდინატორი, ვინმე ედუარდ ნუცუბიძე დილიდან ცდილობდა ჩვენი სხვადასხვა შეხვედრის ჩაშლას, რაც არ გამოუვიდა. ბოლოს, მეოთხე თუ მეხუთე შეხვედრაზე, მან მოიყვანა მკვლელობაზე, ყაჩაღობაზე, ადამიანის დაჭრაზე, იარაღის უკანონო ტარებაზე არაერთგზის ნასამართლევი ალექსანდრე ინდუაშვილი, რომელიც ცნობილი კრიმინალია გორში. მას ჰქონდა სურვილი აერია ჩვენი ერთ-ერთი შეხვედრა. ჩემი დაცვის თანამშრომლებმა საკმაოდ კორექტულად და დელიკატურად აუხსნეს, რომ მას ეს არ გამოუვიდოდა.

ბოლოს შეხლა-შემოხლის შედეგად მან ამოიღო იარაღი და რამდენიმე მიზანმიმართული გასროლა მოახდინა, როგორც ჩემს, ასევე ჩემი დაცვის წევრების მიმართულებით. დაჭრილია ჩემი დაცვის ერთი წევრი და ჩვენი ერთ-ერთი კოორდინატორი", - განუცხადა გუშინ ჟურნალისტებს ირაკლი ოქრუაშვილმა.