"საქართველოს ახალგაზრდა იურისტთა" ასოციაცია შს სამინისტროს მოუწოდებს, მარნეულში პოლიციელების შესაბამისი რაოდენობა გაუშვას.

საია-ს ინფორმაციით, ინციდენტის შედეგად დაშავებულია პოლიციელი და ეს დაუშვებელია.

საია-ს თავმჯდომარე ანა ნაცვლიშვილი იმედს გამოთქვმს, რომ აღნიშნული სიტუაცია სხვა უბნებზე არ გადაინაცვლებს.

"ადამიანების გარკვეული რაოდენობა ძალიან აგრესიულად მოქმედებს. ჩვენი ინფორმაციით, დაშავებულია ერთი პოლიციელი. ძალადობა ყოვლად დაუშვებელია. დაუშვებელია პოლიციელზე თავდასხმა. განსაკუთრებით ასეთი ვანდალური ფორმით. მოვუწოდებ ყველა მხარეს, რომ უზრუნველყონ თავისი წარმომადგენლების მხრიდან კანონის და წესების დაცვა, დაგმონ ძალადობა და მოუწოდონ, რომ ფიზიკური დაპირისპირების ფაქტი არ იყოს წახალისებული. მოვუწოდებ შსს-ს მიიღოს შესაბამისი ზომები და გაგზავნოს პოლიციელები ადგილზე. დარწმუნებული ვარ, ეს ზომები მიღებული იქნება", - განაცხადა ანა ნაცვლიშვილმა.

საია-ს თავმჯდომარეს ამ ეტაპზე ინფორმაცია არ აქვს, თუ რომელ პარტიას ეკუთვნიან აღნიშნული აგრესიული პირები.

არსებული ინფორმაციით, მარნეულის 48-ე უბანზე უცნობი პირები არჩევნების გაყალბებას ცდილობდნენ, რასაც ფიზიკური დაპირისპირება მოხდა. ჩამსხვრეულია იმ შენობის მინები, რომელშიც აღნიშნული უბანია განთავსებული.

მომხდარში "ნაციონალური მოძრაობა" "ქართულ ოცნებას", "ქართული ოცნება" კი "ნაციონალურ მოძრაობას" ადანაშაულებს.