ბოლო წლებია ზამთრის კომუნალური ვაუჩერით თბილისის მოსახლეობა სარგებლობდა, თუმცა მიმდინარე წელს ვაუჩერით სარგებლობას ყველა ვეღარ შეძლებს.

2016 წლის დასაწყისში თბილისის ბიუჯეტში შევიდა ცვლილება, რომლის მიხედვითაც კომუნალური სუბსიდიის დაფინანსება შემცირდა.

როგორც Allnews.ge-ს, თბილისის მერიის ჯანდაცვისა და სოციალური მომსახურების საქალაქო სამსახურში განუცხადეს, ამ წელს კომუნალური ვაუჩერით მხოლოდ სოციალურად დაუცველი ოჯახები ისარგებლებენ.

"2016 წლის იანვრიდან თბილისის ბიუჯეტში განისაზღვრა, რომ მიმდინარე წლის ზამთარში კომუნალურ სუბსიდიას მიიღებენ სოციალურად დაუცველი ოჯახები, 200 000 ქულის ჩათვლით რეგისტრირებული მოსახლეობა. ამ პროგრამას ჰქვია კომუნალური სუბსიდირების პროგრამა, არის მიზნობრივი და განკუთვნილია სოციალურად დაუცველი კატეგორიისათვის.

პროგრამა 5 თვეზეა გათვლილი - ნოემბერი, დეკემბერი, იანვარი, თებერვალი, მარტი. ამ წელს დარჩენილია ნოემბერი და დეკემბერი და შესაბამისად, ამ ორ თვეში კომუნალური სუბსიდია ერიცხებათ მხოლოდ სოციალურად დაუცველ კატეგორიას. ამ ოჯახებს აბონენტის ნომერზე დაერიცხებათ კომუნალური სუბსიდია კომუნალური გადასახადების - წყლის, დასუფთავების და ელექტროენერგის გადასახდელად.

ვინც ფიქრობს, რომ ეს დახმარება სჭირდება, უნდა მიმართონ ჯანდაცვის სამინისტროს სოციალური მომსახურების სააგენტოს, სადაც გაივლიან რეგისტრაციას, იქ შეამოწმებენ ამ ოჯახებს და თუ ეკუთვნით, მათ მიანიჭებენ სოციალურად დაუცველის სტატუსს", - განაცხადეს დედაქალაქის მერიის ჯანდაცვისა და სოციალური მომსახურების საქალაქო სამსახურში.

რაც შეეხება თბილისის 2017 წლის ბიუჯეტს, ის ჯერ დამტკიცებული არ არის, როგორც მერიაში აცხადებენ, კომუნალური სუბსიდირების პროგრამა გაგრძელდება, თუმცა ის არის მიზნობრივი და შეეხება მხოლოდ სოციალურად დაუცველთა კატეგორიას.

თეა ბეჟიტაშვილი