პარლამენტის იურიდიულ საკითხთა კომიტეტი დღეს "შვილად აყვანისა და მინდობით აღზრდის" შესახებ კანონროექტს განიხილავს. საკანონმდებლო ინიციატივის მიხედვით თუ ბავშვი სპეციალური საჭიროების მქონეა, შვილად აყვანის ან მინდობითი აღზრდის მსურველმა შესაბამისი წესით გადამზადება უნდა გაიაროს. კერძოდ, ნებისმიერი მშვილებელი ან მინდობითი აღზრდის მსურველი ვალდებული იქნება, სავალდებულო მოსამზადებელი კურსი გაიაროს, რათა მისი სერტიფიცირება მოხდეს.

ცვლილებების მიხედვით, მშვილებელი ვერ იქნება პირი, რომელიც ნასამართლევია, - "აღნიშნული ცვლილებით წესდება ბავშვის უფლებების დაცვის, მისი ოჯახში სრულფასოვნად აღზრდის მაღალი სტანდარტი, რაც თავის მხრივ, ამცირებს ბავშვის არასათანადო პირობებში მოხვედრის რისკებს", - წერია ინიციატივაში.

ინიციატივის ავტორი ჯანდაცვის კომიტეტის თავმჯდომარის მოადგილე მირიან წიკლაური და პარლამენტის წევრი დიმიტრი ხუნდაძეა. წიკლაურის განმარტებით, მშვილებელსა და ბავშვს შორის ასაკობრივი სხვაობა 45 წელს აღარ უნდა აღემატებოდეს.

ინიციატორები ასევე აღნიშნავენ, რომ კანონპროექტის მიზანი ისეთი რეგულაციების განხორციელებაა, რაც ხელს უფლებამოსილი ორგანოების მიერ გასაშვილებელი ბავშვისთვის სტაბილურ გარემოში მოხვედრას შეუწყობს.