"იმედი ჰოლდინგის" მიერ ტელეკომპანია "მაესტროსა" და GDS-ის შეძენას საზოგადოებაში შეკითხვების გაჩენა მოჰყვა, რომელიც ჰოლდინგის შექმნასა და პოლიტიკურ მოტივებსა და კომპანიის სამომავლო გეგმებს უკავშირდება.

აღნიშნულ პროცესებთან დაკავშირებით, განმარტებები ტელეკომპანია "იმედის" სამეურვეო საბჭოს ხელმძღვანელმა ირაკლი რუხაძემ გააკეთა. მისი თქმით, "მაესტროზე" საინფორმაციოს გაუქმება არ იგეგმება, ხოლო GDS ფუნქციონირებას გასართობი არხის ფორმატში განაგრძობს.

"მაესტროს" გადარჩენის ერთადერთი გზა არის ჰოლდინგში გაერთიანება, რადგანაც არხი არ არის მომგებიანი.

ჰოლდინგში გაერთიანების შემდეგ ის მომგებიანი გახდება," - განაცხადა მან და დასძინა, რომ აღნიშნულ გადაწყვეტილებასთან პოლიტიკას არანაირი კავშირი არ აქვს.

"იმედი" "მაესტროს" და GDS-ის შეძენასთან დაკავშირებით განცხადებას ავრცელებს

"იმედი" " მაესტროს" საკონტროლო პაკეტის მფლობელია, რასაც "მაესტროს" მხრიდან მოლაპარაკებებში ჩართული, გიორგი გაჩეჩილაძე ტელეკომპანიაში არსებულ ფინანსურ კრიზისს უკავშირებს და განმარტავს, რომ მეწილეების მიერ წილის გაყიდვა და ინა გუდავაძის მიერ მისი შეძენა მხოლოდ იმას უკავშირდებოდა, რომ "მაესტროს" წილი ნიკა გვასამიასთან და "რუსთავი 2"-თან არ წასულიყო. "მინდოდა, ეს ბიზნესგარიგება შემდგარიყო და ამაში მეც მივიღე მონაწილეობა," - აღნიშნავს ის.

მამუკა ღლონტს "მაესტროს" "იმედი ჰოლდინგში გაერთიანებასთან დაკავშირებით განსხვავებული მოსაზრება აქვს.

მისი თქმით, გარიგება არჩევნების წინ მოხდა დ ამ საკითხის უკან ხელისუფლება დგას, - "ვამბობდი, რომ მაესტროს რეალური მყიდველი არის ირაკლი რუხაძე. ხოლო ირაკლი რუხაძის რეალური მყიდველი ვინ არის და იმედის რეალური მყიდველი, ამის მიხვედრა ძნელი არ არის. ახლა საუბრობენ, რომ იმედმა შეძინა "ჯიდიესი" და "მაესტრო," მაგრამ მე ასე ვიტყოდი, "ჯიდიესმა" შეიძინა "მაესტრო" და "იმედი".

ყველაფრის უკან მე ვხედავ ხელისუფლებას და ბიძინა ივანიშვილი," - აღნიშნავს ის.

ერთ ჰოლდინგში გაერთიანების შემდეგ, ქართული კანონმდებლობის შესაბამისად, სამიდან ორ ტელევიზიაში საინფორმაციო სამსახურმა მუშაობა უნდა შეწყვიტოს. თუმცა, "იმედის" სამეურვეო საბჭოს ხელმძღვანელის, ირაკლი რუხაძის თქმით, "მაესტროს" საინფორმაციო გამოშვება ფუნქციონირებას არ შეწყვეტს. როგორც კი "იმედისა" მიერ "მაესტროსა" და "GDS"-ის შეძენა დოკუმენტალურად დადასტურდება, აღნიშნულ საკითხზე მსჯელობას კომუნიკაციების ეროვნული კომისია დაიწყებს.

"მაუწყებლობის შესახებ კანონი კონცენტრაციის აკრძალვის საკითხს ადგენს, რაც ერთი და იგივე გეოგრაფიულ ზონაში ორი საერთო საეთერო ტელემაუწყებლობის ფლობის საკითხს ადგენს," - განმარტავს კომუნიკაციების ეროვნული კომისიის საზოგადოებასთან ურთიერთობის სამსახურის ხელმძღვანელი, ხატია ყურაშვილი.

იურისტისა და ჟურნალისტის, ლაშა ტუღუშის განმარტებით, კანონდარღვევა იქნება, თუ ჰოლდინგის შემადგენელ ტელევიზიებში საინფორმაციო გამოშვება მხოლოდ ერთ მათგანში არ დარჩება.

"კანონით აკრძალულია, ერთ მესაკუთრეს რამდენიმე მაუწყებელი ჰქონდეს.

ორ მათგანში მაინც საინფორმაციო გამოშვების დატოვება კანონსაწინააღმდეგო ქმედება იქნება. თუ სამაუწყებლო ფუნქცია მხოლოდ ერთ ტელეკომპანიას ექნება, ამ შემთხვევაში, საქმე დარღვევასთან არ გვაქვს. ჩემთვის გაუგებარია, ასეთი დიდი კორპორაციის ხელმძღვანელები ასეთ გაუგებარ განცხადებებს რატომ აკეთებენ," - დასძენს ის.

ჟურნალისტური ეთიკის ქარტიის აღმასრულებელი დირექტორი, ნატა ძველიშვილი, "იმედის," "მაესტროსა" და GDS-ის გარშემო განვითარებულ მოვლენებში მედიის შესუსტების საფრთხეებს ხედავს. მისი თქმით, ეს მხარეების პოლაზირებას გამოიწვევს, რადგან ერთ მხარეს იქნება "რუსთავი 2," რომლის შესახებ სასამართლოს გადაწყვეტილება ჯერ ცნობილი არ არის და მეორე მხარეს "იმედი ჰოლდინგი".

ამგვარი გადალაგებით, მრავალფეროვნების ნაცვლად ვიღებთ ერთფეროვნებას, რადგან მინიმუმ ორ არხზე საინფორმაციო გამოშვებები უნდა დაიხუროს, შესაბამისად, კონკურენციის ნაკლებობა იქნება.

რეალურად, ქვეყანაში არსებულ მთავარ არხებზე გაურკვევლობაა და რატომღაც ასეთი ცვლილებები ყოველთვის არჩევნების დასრულებას ეხება ხოლმე.

ეს მიუთითებს, რომ მედია, როგორც მდგრადი სფერო არ არსებობს და ის დამოკიდებულია იმაზე, თუ როგორი იქნება არჩევნების შედეგები," - განმარტავს ნატა ძველიშვილი.

პოლიტოლოგ ირაკლი ტაბლიაშვილის თქმით, მედიაში მიმდინარე ამგვარი ცვლილებები პლურალიზმს საფრთხეს უქმნის, რის შედეგადაც მთავარი პოლიტიკური მოთამაშის, ხელისუფლების მიმართ ნაკლებ კრიტიკას მივიღებთ.

"ვიღებთ ნაკლებ თოქ-შოუს, ნაკლებ საინფორმაციო გამოშვებას და ვიღებთ გარემოს, რომლის შედეგადაც ამ ჩანასახში არსებული ქართული ჟურნალისტიკა, კიდევ უფრო გაღარიბდება და დასუსტდება," - აცხადებს ის.

აღსანიშნავია, რომ ტელეკომპანია GDS-ის შემთხვევაში, ჰოლდინგის შემადგენლობაში მხოლოდ GDS TV-ია, Georgian Dream Studio კი ფუნქციონირებას ისევ ჩვეულ რეჟიმში გააგრძელებს. რაც შეეხება, ჰოლდინში შემავალი კომპანიების რეორგანიზაციის საკითხს, უცნობია, რამდენი თანამშრომელი დატოვებს ტელეკომპანიებს ან რომელი გადაცემები გააგრძელებს მაუწყებლობას.

მარიამ მენაბდიშვილი