საქართველოში მიღებული განათლება ევროპელებისა და ამერიკელებისთვისაც საინტერესო ხდება | Allnews.Ge

2016 წელს საქართველოს უმაღლეს საგანმანათლებლო დასწესებულებებში 6 643 უცხოელი სტუდენტი დაფიქსირდა.

საქართველოს სტატისტიკის ეროვნული სამსახურის ინფორმაციით, საერთო რაოდენობიდან 3 822 საბაკალავრო პროგრამებზე სწავლობდა, 2 805 – მაგისტრატურასა და რეზიდენტურაზე, 16 კი - პროფესიულ პროგრამაზე.

უცხოელი სტუდენტებისთვის ყველაზე მოთხოვნადი საბაკალავრო პროგრამებია სოციალური მეცნიერებები, ბიზნესი და სამართალი და ჯანდაცვა და სოციალური უზრუნველყოფა. სამაგისტრო პროგრამებიდან კი უცხოელ სტუდენტებში ცალსახა ლიდერი ჯანდაცვა და სოციალური უზრუნველყოფაა.

სამედიცინო ფაკულტეტზე უმეტესად ინდოელი სტუდენტები სწავლობენ. მათივე განმარტებით, ისინი საქართველოში კარგ სამედიცინო განათლებას შედარებით დაბალ ფასად იღებენ, შემდეგ კი სამშობლოში ბრუნდებიან და კარგ სამსახურს შოულობენ.

საზღვარგარეთ სასწავლებლად წასული ქართველი სტუდენტების რიცხვი შემცირდა

აღმოსავლეთ ქვეყნებიდან ჩამოსული სტუდენტების პარალელურად, საქართველოში მზარდია ევროკავშირის წევრი ქვეყნებისა და აშშ-დან ჩამოსული სტუდენტების რაოდენობაც. სტუდენტთა გაცვლითი პროგრამის "ერასმუს +-ის" საშუალებით საქართველოში უკვე რამდენიმე წელია ევროპელი სტუდენტები ჩამოდიან. სან დიეგოს სახელმწიფო უნივერსიტეტი საქართველოში კი უკვე მესამე წელია არსებობს. ეს არის ამერიკული უნივერსიტეტი საქართველოში, რომელიც კურსდამთავრებულებს ამერიკულ დიპლომს სთავაზობს. აღნიშნულ უნივერსიტეტში საქართველოს მოქალაქეების პარალელურად, საერთაშორისო სტუდენტებიც სწავლობენ.

თბილისის სახელმწიფო უნივერსტიტეტიც ერთ–ერთია მათ შორის, რომელიც "ერასმუსის" გაცვლით პროგრამაში მონაწილეობს. გაცვლითი პროგრამის კოორდინატორის მარიამ რაზმაძის განმარტებით, უფრო მეტი წასვლის მსურველია, ვიდრე აქ ჩამომსვლელი, თუმცა უნივერსიტეტში ევროპელი სტუდენტების რაოდენობა მზარდია. მათი მიღება სემესტრულად ხდება.

ევროკავშირის არაწევრი სახელმწიფოების სტუდენტები და მკვლევარები ევროკავშირის ქვეყნებში დარჩენას და დასაქმებას შეძლებენ

"შემოდგომის სემესტრში 13 სტუდენტი გვყავდა ევროპის უნივერსიტეტებიდან, გაზაფხულის სემესტრში კი 10–ს ველოდებით. ძირითადად არიან გერმანიიდან, იტალიიდან, ლიტვიდან, ლატვიიდან, ესტონეთიდან, ჰოლანდიიდან, პოლონეთიდან და ჩეხეთიდან. სწავლა შეუძლიათ სოციალურ–პოლიტიკურ მეცნიერებებისა და ეკონომიკის მიმართულებაზე. უცხოელი სტუდენტებზე გათვლილი პროგრამები უმეტესად სამაგისტრო საფეხურზეა.

კონკურსი თსუ–სა და პარტნიორ უნივერსიტეტს შორის ერთობლივად ცხადდება. მსურველებისთვის პირველ ეტაპზე საკუთარ უნივერსიტეტში ცხადდება კონკურსი. უმაღლესქულიანების მონაცემები იგზავნება ჩვენთან და მეორე ეტაპი უკვე თბილისის სახელმწიფო უნივერსიტეტში კონკურსია. წინასწარ ვაზუსტებთ, რომ მათ მიერ მოთხოვნილი საგნები ჩვენთან სათანადოდ ისწავლებოდეს, რომ კურსის დამთავრების შემდეგ მიღებული კრედიტები, მათმა უნივერსიტეტმა აღიაროს," - ამბობს მარიამ რაზმაძე.

თბილისის სახელმწიფო უნივერსიტეტის ევროპელ სტუდენტებს შორისაა 29 წლის კარლ ბრუნინგი. ის საქართველოში ერთი სემესტრით ჩამოვიდა და სოციალურ–პოლიტიკურ მეცნიერებათა ფაკულტეტზე სწავლობს.

"გაცვლითი პროგრამის ფარგლებში საქართველოში, რუსეთსა და უკრაინაში შემეძლო წავლა. მე საქართველოზე გავაკეთე არჩევანი, თუმცა ამ ქვეყნის შესახებ ბევრი არაფერი ვიცოდი.

როცა ჩამოვედი, კულტურული შოკი მივიღე.

ახლა ყველაფერს შევეჩიე და საქართველოში ჩამოსვლას ყველას ვურჩევ. თუმცა ჩამოსვლამდე, აუცილებლად წინასწარ მოაგვარონ საცხოვრებელი ადგილის საკითხი და გაითვალისწინონ, რომ ქართველები შედარებით ხმაურინი ხალხია. სწავლის ხარისხი მომწონს, მაგრამ ზოგჯერ ლექტორები შეფასებისას ნაკლებად სამართლიანები არიან," - ამბობს გერმანელი სტუდენტი.

ყველა ქართველი სტუდენტი აშშ-ში სწავლაზე ოცნებობს, თუმცა აღმოჩნდა, რომ სან დიეგოს სახელმწიფო უნივერსიტეტის საქართველოს 10-მა ამერიკელმა სტუდენტმა საქართველოში სწავლის გაგრძელება მოითხოვა და ამის ნებართვაც მიიღო. ფაკულტეტები, სილაბუსები და კურსები სან დიეგოს სახელმწიფო უნივერსიტეტის საქართველოს კამპუსზე კალიფორნიის კამპუსის იდენტურია.

"ძალიან გაგვიმართლა, რომ საქართველოში ცხოვრების შანსი მოგვეცა. ბედნიერი ვარ, რომ მეორე სემესტრშიც აქ ვისწავლი. ამერიკელი სტუდენტების უმეტესობას ინგლისში, ავსტრალიაში, ესპანეთსა და სხვა ლიდერ ქვეყნებში სურთ განათლების მიღება. მე კი არჩევანი გავაკეთე ქვეყანაზე, რომელსაც განსხვავებული კულტურა აქვს. გადაწყვეტილებით ნამდვილად კმაყოფილი ვარ," - ამბობს კალიფორნიელი სტუდენტი ტეილორ ინუიე.

"განსხვავებული კულტურისა და ტრადიციების ქვეყანაში მინდოდა სწავლა და ეს მოვახერხე კიდეც. ბედნიერი ვარ, რომ საქართველოში სწავლის საშუალება მომეცა. სასწავლო პროცესი ნაყოფიერია. ლექტორებთან საკმაოდ ღია და ახლო ურთიერთობა გვაქვს, რაც განათლების მიღების მაღალ ხარისხს უზრუნველყოფს." - განმარტავს გონსალო ტუკერი.

"ძალიან კარგი გარემოა აქ. სწავლის ხარისხის გარდა, თბილისი და აქაური ცხოვრების წესიც ძალიან მომწონს," - ამბობს სამანტა კროუფორდი.

სტუდენტებზე დიდი შთაბაჭდილება მოახდინა ადგილობრივმა მოსახლეობამ.

"საოცარი კეთილგანწყობა იგრძნობა, როცა გზას გვასწავლიან, ვიღაც ინგლისურად ლაპარაკს ცდილობს, ტაქსის მძღოლს ერთი კვირის შემდეგაც ვახსოვართ, ან ვიღაც გადაჭედილ ავტობუსში ბილეთს გადმოგვაწოდებს", - ამბობს ტეილორი.

29 წლის მარჩინ რუთოვიჩზი საქართველოში ილიას სახელმწიფო უნივესტიტეტში "ერასმუს +"-ის საშუალებით მოხვდა. სადოქტორო პროგრამასთან დაკავშირებულ პროექტზე სამუშაოდ გადაწყვიტა ჩამოსვლა, რადგან მისი კვლევის საგანი საქართველოა. ის განვითარებად ქვეყანაში - საქართველოში საინვესტიციო გარემოსა და უცხოურ კაპიტალზე აწარმობს კვლევა-დაკვირვებას. ერასმუსის პროგრამის მონაწილე ყველა სტუდენტის მსგავსად, რუთოვიჩზსაც ევროკავშირი აფინანსებს.

"პროფესიულად თუ შევხედავთ, საქართველოში გატარებული ყოველი დღე მნიშვნელოვანია ჩემთვის და მიმდინარე პროცესები ძალიან მომწონს. მეორე მხრივ, ძალიან მომწონს ადგილობრივი მოსახლეობა. გულღია და თბილი ხალხი ცხოვრობს.

მინდა აღვნიშნო, რომ საქართველოში ცხოვრება მარტივი არაა.

თუმცა ქართველ ახალგაზრდებს მომავლის მიმართ პოზიტიური დამოკიდებულება აქვთ. მომწონს ქართული კერძები.

ვფიქრობ, რომ აქაური ელექტრონული მუსიკის საღამოები დიდებულია. ასევე, ძალიან მომწონს თბილისის დივერსიფიკაცია როგორც კულტურული, ისე რელიგიური კუთხით. თუმცა საქართველოში არის რაღაცები, რაც არ მომწონს. მაგალითად, საზოგადოების ნაწილს საკმაოდ კონსერვატიული მიდგომები აქვს. არ მომოწონს, რომ ბუნებას სათანადოდ არ იცავენ. თბილისში ბევრი მანქანა და პარკირების ცოტა ადგილია. ზაფხულში ველოსიპედით დავდივარ ხოლმე, რაც საკმაოდ საშიშია. ძალიან ცოტაა დასასვენებელი პარკები," - განმარტავს მარჩინ რუთოვიჩზი.

ის საქართველოში ჩამოსვლას ყველას ურჩევს და ამბობს, რომ აქ მოგზაურობა და ცხოვრება ძალიან უსაფრთხოა, ხალხი კი მეგობრულია.

სტუდენტების ნაწილი საქართველოში დაბრუნებას სწავლის დამთავრების შემდეგაც არ გამორიცხავს.

"რამდენიმე ჩვენგანს მომავალში საერთაშორისო ორგანიზაციებში უნდა მუშაობა და სწორედ ამიტომ გადავწყვიტეთ სწავლა საზღვარგარეთ, ნაკლებად ტრადიციულ ადგილას. ჩვენ გვინდოდა, მოვრგებოდით განსხვავებულ კულტურას, გარემოს და დამოუკიდებლად ცხოვრება გვესწავლა. სამომავლოდ შეიძლება აქ საქმიანობის დაწყებაზეც კი ვიფიქროთ," - განმარტავს ტეილორ ინუიე.

უცხოელი სტუდენტების დამოკიდებულება თბილისისა და საქართველოს მიმართ უმეტესად პოზიტიურია. თუმცა გერმანელი სტუდენტი კარლ ბრუნინგი ამბობს, რომ თავიდან ქალაქში არსებული ნაგვის რაოდენობით შოკირებული იყო. უცხოელებში საქართველოზე ტრადიციულად დადებითი ემოციის მიუხედავად, არსებობს ერთი პრობლემა, რომელიც ბევრ ვიზიტორს უქმნის პრობლემას. ეს მათი მოტყუებაა.

"საქართველოში საკვები ძვირია" - რას ყვებიან კანადელი ტურისტები, რომლებმაც 35 ქვეყანაში იმოგზაურეს

"მგონია, რომ გამყიდველები ხშრად მატყუებენ. ამიტომ ყველაფერს მარკეტებში ვყიდულობ, სადაც ფასები მითითებულია," - ამბობს გერმანელი სტუდენტი კარლ ბრუნინგი.

უცხოელ სტუდენტებთან საუბრისას პოზიტიურთან ერთად, რამდენიმე პრობლემამ თუ რჩევამაც იჩინა თავი. თუმცა, ერთი რამ ცხადია, ქართულ უნივერსიტეტებში უფრო და უფრო მეტი უცხოელი სტუდენტი იღებს განათლებას. აღმოსავლეთის ქვეყნებისთვის საქართველოში განათლების მიღება უკვე ტრადიციული ტრენდია. პარალელურად კი, ევროპელი და ამერიკელი სტუდენტების რაოდენობა მკვეთრად მზარდია.

ნანა მღებრიშვილი