ამერიკის შეერთებულ შტატებში ინაუგურაციის უკანასკნელი მოსამზადებელი ღონისძიებები მიმდინარეობს. დღეს ქვეყნის ახლადარჩეული პრეზიდენტი, დონალდ ტრამპი მართვის სადავეებს ოფიციალურად გადაიბარებს. პარალელურად ვაშინგტონში საპროტესტო აქციები მიმდინარეობს. თეთრი სახლის ირგვლივ განვითარებული მოვლენები მსოფლიოს ყურადღების ცენტრშია.

სანამ დონალდ ტრამპი ფიცს დადებს, ანალიზისა და კონსულტაციის ჯგუფი "ეისითი", მოსახლეობის აზრით დაინტერესდა, რა გავლენას იქონიებს საქართველოზე თეთრი სახლის 45-ე ლიდერი. "ეისითიმ" გამოკითხვა თბილისში შემთხვევით შერჩეულ 400 ზრდასრულ ადამიანს შორის, მიმდინარე წელს ჩაატარა.

გამოკითხულთა უმეტესობას აღნიშნულ საკითხთან დაკავშირებით მოსაზრება არ აქვს.

მოსახლეობის 12% მიიჩნევს, რომ ტრამპს ჩვენს ქვეყანაზე დადებითი გავლენა ექნება, 13%-ის აზრით კი, მისი გავლენა ნეგატიური იქნება.

გამოკითხულთა შორის იყვნენ ისეთი ადამიანებიც, რომლებიც ფიქრობენ რომ ტრამპს საქართველოს მიმართ ნეიტრალური პოზიცია ექნება.

სტატისტიკური ცდომილება 4,9%-ს არ აღემატება.