"800 ათასი ლარის ღირებულების ნივთი დაგვეწვა, იმპორტიორი კომპანია ვართ და სხვებს ვერცხლით ვამარაგებთ..." "50 ათასი დოლარის ღირებულების ოქროს სამკაულები მქონდა შენახული და გადარჩა თუ არა, არ ვიცი..." - ჰყვებოდა "ბავშვთა სამყაროს" ხანძრის შედეგად დაზარალებული ათეულობით მოვაჭრე.

მათი თქმით, ხანძრის გაჩენის შესახებ 30 იანვრის ღამეს, დაახლოებით 03:00 საათზე შეიტყვეს. ადგილზე მისულებს, შენობა მთლიანად ალში გახვეული დახვდათ. მეხანძრეები მის ჩაქრობას ცდილობდნენ, თუმცა უშედეგოდ. "05:15 საათზე მომივიდა ობიექტზე განგაშის შეტყობინება, შემდეგ დაცვის პოლიციამ დაგვირეკა და ხანძრის შესახებ შეგვატყობინა. 10 წუთში მივედით და შიგნით იმხელა კვამლი იდგა, რომ ვერ შევიდოდი,"-იხსენებს ერთ-ერთი დაზარალებული.

დილის 08:00 საათზე შენობას ისევ ცეცხლი ეკიდა და მეხანძრეები მის ჩაქრობას აქტიურად ცდილობდნენ.

მოვაჭრეებმა მძიმე საქონლის, ჭაღების, ავეჯის, სათამაშოებისა და საყოფაცხოვრებო ნივთების გამოტანა ვერ შეძლეს. სრულად განადგურდა საკანცელარიო ნივთები, ტანსაცმელი და თეთრეული, რაც შეეხება ძვირფას ლითონებს, ისინი საცავში ინახებოდა და მათი უვნებლად გამოტანა მოვაჭრეებმა დღეს შეძლეს.

დღის პირველ ნახევარში შემთხვევის ადგილზე თბილისის მერი, დავით ნარმანია მივიდა და განაცხადა, რომ "ბავშვთა სამყაროში" გაჩენილი ხანძრისგან დაზარალებული მოვაჭრეების წინაშე პასუხისმგებლობა, პირველ რიგში, ბაზრის ადმინისტრაციამ უნდა აიღოს.

"ადმინისტრაცია, პასუხისმგებელია გამოჩნდეს ამ ადამიანებთან, უთხრან მათ, რით შეუძლიათ დაეხმარონ. გამოძიებით უნდა დადგინდეს ხანძრის გამომწვევი მიზეზები. ძალიან ბევრ კითხვას, რომელიც ამ ადამიანების მხრიდან არსებობს, უნდა გაეცეს პასუხი,"-განაცხადა მან.

დღეს კი დავით ნარმანიამ განაცხადა, რომ ბანკების მხრიდან ხანძრის შედეგად დაზარალებული მოვაჭრეების მიმართ სოლიდარული პასუხისმგებლობა ძალიან მნიშვნელოვანია. მისი თქმით, ხანძრის შედეგად დაზარალებულ მოვაჭრეებს სხვა ბაზრებზე შეღავათიან რეჟიმში ვაჭრობის შესაძლებლობა ექნებათ. მათ დასახმარებლად, დღეს, თბილისის მერიაში, დავით ნარმანია თათბირსაც გამართავს.

30 იანვარს, დაახლოებით დღის პირველ საათზე, ხანძრის ახალი კერები "ბავშვთა სამყაროს" უკან, საწყობებშიც გაჩნდა.

აღნიშნული საწყობებიდან მოვაჭრეებს თავიანთი საქონელი გაჰქონდათ, რათა არ დაზიანებულიყო, მათი დაცლის შემდეგ კი საღებავებისა და წებოს საწყობები კვამლში გაეხვია.

მოვაჭრეებისა და თვითმხილველების თქმით, ხანძარი, თავდაპირველად "ბავშვთა სამყაროს" უკანა მხარეს განთავსებულ "არჩევანის" ბაზრობის დახლებს გაუჩნდა, რომელიც რკინის კარით 18:30-დან 19:00 საათების ინტერვალებში იკეტება და მისი გასაღები, მოვაჭრეების თქმით, მხოლოდ სავაჭრო ცენტრის ადმინისტრაციასა და დაცვის სამსახურს აქვს. მაღაზიების მფლობელებს ხანძრის ელექტროგაყვანილობის შედეგად გაჩენა არაადეკვატურად მიაჩნიათ, რადგან, მათი თქმით, სავაჭრო ცენტრის დაკეტვის შემდეგ, შენობაში ელექტროენერგიას სრულიად თიშავენ.

კვამლმოდებული საწყობებიდან მოვაჭრეებმა თავიანთი ნივთების გამოტანა და მოშორებით წაღება შეძლეს, რაშიც მათ მეხანძრეებიც ეხმარებოდნენ. გაჩნდა "ბავშვთა სამყაროს" მარჯვენა კედლის ჩამონგრევის საფრთხეც, რადგან მისი რამდენიმე სართულის იატაკის ნაწილი ჩამოიშალა.

დაახლოებით, 15:00-ზე სავაჭრო ცენტრის აღმასრულებელმა დირექტორმა, გიორგი მაჭავარიანმა განაცხადა, რომ სავაჭრო ცენტრის ადმინისტრაცია სრულად გრძნობს შექმნილ ვითარებას და პასუხისმგებლობას საკუთარ თავზე იღებს, - "ამასთან, ჩვენ გვსურს, დაველოდოთ გამოძიების საბოლოო შედეგს. რაც შეეხება ინფორმაციას, ხანძრის ხელოვნულად გაჩენის თაობაზე, სრულად გამოვრციხავ,"-განაცხადა მან.

"ბავშვთა სამყაროს" მიმდებარე ტერიტორიაზე უმრავლესობისა და ოპოზიციის სხვა წარმომადგენლებიც იმყოფებოდნენ. ისინი მოვაჭრეებს შეხვდნენ და შექმნილი ვითარებიდან გამოსავლის შესახებ ესაუბრნენ.

მიუხედავად იმისა, რომ 30 იანვარს, დღის მეორე ნახევარში ხანძრის ლიკვიდაცია თითქმის დასრულა და ძირითადად, დაკვამლიანების პროცესი მიმდინარეობდა, საღამოს სავაჭრო ცენტრში ცეცხლი ისევ გაჩნდა და მეხანძრეებს მისი ლიკვიდირება თავიდან მოუწიათ. ისინი ცეცხლს რამდენიმე საათის განმავლობაში აქრობდნენ.

რაც შეეხება დაზარალებულებს, გუშინ ღამით, ისინი აცხადებდნენ, რომ მათ არავინ დაკავშირებიათ და ინფორმაცია არ ჰქონდათ, თუ რა ბედი ეწიათ მათ საქონელს. დღეს, დაახლოებით 11:00 საათიდან, სამართალდამცავებმა ძვირფასი ლითონების მფლობელთა ოთხ-ოთხ კაციანი ჯგუფების შეშვება დაიწყეს. ისინი შედიოდნენ და კრიმინალისტებისა და სამაშველო ჯგუფის დახმარებით, საცავიდან საკუთარი ნივთები გამოჰქონდათ. აღნიშნული პროცესი ამ დრომდე არ დასრულებულა, ხოლო ვინც საკუთარი ნივთები გამოიტანა, განაცხადა, რომ ისინი უვნებელია.

ადგილზე დღეს დილით, თბილისის მერის მოადგილე, ლაშა აბაშიძე და საგანგებო სიტუაციების მართვის სააგენტოს დირექტორი, ზვიად ქაწაშვილიც იმყოფებოდნენ. ზვიად ქაწაშვილის თქმით, სავაჭრო ცენტრში ხანძრის გარკვეული კერებია დარჩენილი, რადგან მაშველები შენობის გარკვეულ ნაწილში შესვლას ჯერ კიდევ ვერ ახერხებენ.

აღსანიშნავია, რომ მოვაჭრეების საკუთარი ნივთების გამოსატანად შენობაში შესვლისთვის ნების დართვა, სავაჭრო ცენტრის გამაგრების შემდეგ მოხდა.

არსებული ინფორმაციით, შესაძლოა, სავაჭრო ცენტრის დემონტაჟი მოხდეს, რადგან ის ხანძრისგან მთლიანად განადგურდა, რაც შეეხება შენობის გასხვისებას, "ბავშვთა სამყაროს" დირექტორის, გიორგი მაჭავარიანის თქმით, დამწვარი სავაჭრო ცენტრის გაყიდვა არ იგეგმება.

ამ დროისთვის, სავაჭრო ცენტრის დაკვამლიანება თითქმის დასრულებულია და მეხანძრეები ადგილზე ისევ აქტიურად მუშაობენ. რაც შეეხება მოვაჭრეებს, ისინი თბილისის მერიასთან აქციას მართავენ. ისინი თბილისის მერთან დავით ნარმანიასთან შეხვედრას ითხოვენ და აცხადებენ, რომ მათ ყურადღებას არავინ აქცევს.

აქციის მონაწილეები ამბობენ, რომ ყურადღებას მხოლოდ ოქროს ბირჟაზე მოვაჭრეებს აქცევენ.

"ეს ყველაფერი იმისთვის კეთდება, რომ იქ აშენდეს სუპერმარკეტები და მოლი,"- აცხადებენ აქციის მონაწილეები. დაზარალებულთა ნაწილის თქმით, "ბავშვთა სამყაროს" ტერიტორიაზე სავაჭრო ცენტრ "კარფურის" მშენებლობა იგეგმება, თუმცა ინფორმაცია ჯერჯერობით არ დასტურდება.

როგორ დაეხმარება თბილისის მერია ხანძრით დაზარალებულებს, ცნობილი დღეს, დაგეგმილ თათბირზე გახდება.

მარიამ მენაბდიშვილი