დათბობასთან ერთად, ზამთრის პერიოდში გამოსულ, ახალ პიგმენტურ ლაქებსა თუ წანაზარდებს, მარტივად შეამჩნევთ. ამას ისიც ემატება, რომ კანზე მზე აქტიურად ზემოქმედებს, რაც პიგმენტური ხალების გადაგვარების შანსს კიდევ უფრო ზრდის. გამუქებული თუ, ფორმაშეცვლილი ხალი, ხშირად პანიკის საბაბი ხდება, ან პირიქით, ბევრ ჩვენგანს უყურადღებოდაც რჩება.

დერმატოლოგები გვირჩევენ, რომ კანზე წანაზარდებს ყურადღება მივაქციოთ და პროფილაქტიკური გამოკვლევები ჩავიტაროთ. როგორ უნდა ამოვიცნოთ გადაგვარებული ხალი და რა შემთხვევაში უნდა მივმართოთ ექიმს, ამის შესახებ დერმატოლოგ სოფო ლილუაშვილს ვკითხეთ.

კანზე წანაზარდები შესაძლოა, როგორც ავთვისებიანი ისე კეთილთვისებიანი იყოს. ამ უკანასკნელთა რიცხვს მიეკუთვნება, ვირუსული დაავადებების დროს განვითარებული კანის წანაზარდები, მეჭეჭი, პაპილომა ვირუსით გამოწვეული ე.წ კანის პაპილომები და ხალი. რაც შეეხება ავთვისებიანს, გვხვდება სამი ძირითადი ფორმა: ბაზალურ-უჯრედოვანი კარცინომა, ბრტყელ-უჯრედოვანი კარცინომა და მელანომა.

რა ძირითადი ფაქტორები იწვევს სიმსივნურ დაავადებებს

დერმატოლოგის თქმით, გარდა ზოგადად მიღებული ვიზუალური ნიშნებისა, იქნება ეს საეჭვო შეფერილობა, ანუ ჭრელი და არაერთგვაროვანი ფერი, დარღვეული საზღვრები, სუბიექტური შეგრძნებები, ქავილი, წვა, ტკივილი, ან კიდევ ხალის გაზრდა, როგორც კანის ზედაპირზე ისე მის ზემოთ, არის კიდევ რამდენიმე ნიშანი, რომლებსაც, მხოლოდ ექიმები ამჩნევენ და ამასთან, შეუიარაღებელი თვალით რთული შესამჩნევია.

"თუ ეს არის კეთილთვისებიანი წარმონაქმნები, ვირუსული წანაზარდები, უნდა მოხდეს ჯეროვანი მკურნალობა, იმიტომ, რომ

თვითმკურნალობა გარკვეულ რისკებთანაა დაკავშირებული.

შესაძლოა, განვითარდეს მეორადი დაინფიცირება ან მოხდეს არასრული მოშორება."

დაუშვებელია, ხალის მექანიკური გაღიზიანება, ასე ვთქვათ თვითნებული მოწვა, რადგან ხალი განიცდის ტრანსფორმაციას და შეიძლება სრულებით კეთილთვისებიანი ხალი ავთვისებიანად გადაიქცეს. საზოგადოებაში მყარადაა დამკვიდრებული მოსაზრება, რომ მზეზე ყოფნა პიგმენტური ლაქებისა და წანაზარდებისთვის სახიფათოა. რეალურად ეს ასეც არის. საჭირო ვიტამინების მისაღებად, კავკასიის რეგიონში მცხოვრებელებისთვის 10-15 წუთი საკმარისია.

პათოლოგიად ითვლება, პლაჟზე საათობით ყოფნა, ან სოლარიუმის გადამეტებული მოხმარება. გადაჭარბებული მზის დასხივება პირველი ფაქტორია, რომელმაც კეთილთვისებიანი წარმონაქმნი, შესაძლოა, ავთვისებიანად გადააქციოს, ანუ მისი გადაგვარება დაჩქარდეს.

"დიდი მნიშვნელობა აქვს მზის გამოსხივებას, ეს უნდა იყოს ლიმიტირებული.

პიგმენტური ხალების შემთხვევაში, მზის გამოსხივება სასურველი არ არის."

თუ განსაკუთრებით დიდი რაოდენობის პიგმენტური ხალი გაქვთ, ეს აუცილებლად იმას არ ნიშნავს, რომ მაღალი რისკის მქონე ადამიანთა რიგს მიეკუთვნებით. დიდი რაოდენობა არ უდრის მაღალთვისებიანობის ხარისხს, რადგან ნებისმიერი პათოლოგია საბოლოოდ ინდივიდუალურია და მოფრთხილებასა და მეთვალყურეობას თანაბრად საჭიროებს.

რომელი ადგილები ითვლება მაღალი რისკის შემცვლელ არეებად?

ხალი შეიძლება ნებისმიერ ადგილზე განვითარდეს და გადაგვარების რისკიც, შესაბამისად, ნებისმიერ ადგილზე აღმოჩნდეს. ყველაზე სარისკოდ ის ადგილები მიიჩნევა, რომლებსაც მზის სხივები ყველაზე ხშირად ეხება და ტანსაცმლით არ იფარება.

აღმოჩნდა, რომ ზოგადად ხალის მოწვა, თანამედროვე მეთოდად საერთოდაც აღარ მიიჩნევა.

რადგან ხალის მექანიკურ გაღიზიანებად ითვლება. უფრო მიღებულია, გადაგვარებული ხალი ქირურგიული განაკვეთის გზით მოცილდეს, რის შემდეგაც, ქსოვილების გამოკვლევის მიზნით, მასალა ბიოფსიურ გამოკვლევაზე გადაიგზავნება.

მიზეზები, რის გამოც ბავშვებში სიმსივნის შემთხვევები გაიზარდა

ხალის პათოლოგია ინდივიდუალურია და დამოკიდებულია მთელ რიგ გარემოებებზე, იქნება ეს ასაკი, მზის ზემოქმედება, მექანიკური გაღიზიანება, ლოკაცია და ა.შ. აუცილებლად უნდა გაითვალისწინოთ, დერმატოლოგის რჩევა, რომ დაუშვებელია პიგმენტურ ხალზე გაზრდილი თმის მოცილება, უმჯობესია მოიჭრათ, რადგან ეპილაცია, ან სახლის პირობებში თმის მოსაცილებელი ხელსაწყოების გამოყენება, მექანიკური ზემოქმედება, რაც ხალის გადაგვარების რისკს ზრდის.

ნარიტა ჩხაიძე