ვის მივმართოთ და რა პროცედურები უნდა გავიაროთ კორპუსებზე მიშენების დასარეგისტრირებლად
გარდა მრავალსართულიანი კორპუსების გახშირებული მშენებლობისა, თბილისის მცხოვრებლების ნაწილს დისკომფორტს მიშენებებიც უქმნის, რასაც "საქართველოს სახალხო დამცველის აპარატიც" ადასტურებს.
სახალხო დამცველის მოადგილის, ნათია კაციტაძის თქმით, ომბუდსმენს მიშენების გამო, საჩივრით რამდენიმე ერთეულმა მოქალაქემ მიმართა, რის შემდეგაც უწყება აღნიშნული საკითხით დაინტერესდა.
"ჩვენ ვფიქრობთ, რომ არქიტექტურის სამსახურის მხრიდან საკითხის მეტი შესწავლაა საჭირო. სპეციალისტებმა პასუხი უნდა გასცენ შეკითხვას, აყენებს თუ არა მიშენებები ზიანს სხვა მაცხოვრებლებს," - განმარტავს ის და დასძენს, რომ სახალხო დამცველი მიშენებების საკითხით დაინტერესებულია.
როგორც გაირკვა, მრავალსართულიან ბინაზე მიშენების განხორციელების აკრძალვის შესახებ კანონი, ძალაში 2007 წელს შევიდა, შესაბამისად, თბილისის მერიის არქიტექტურის სამსახური მხოლოდ ამ თარიღამდე მიშენებული ობიექტის ლეგალიზაციას ახდენს. უწყების ინფორმაციით, მიშენებად შეიძლება ჩაითვალოს ნებისმიერი კონსტრუქციული დეტალი, რომელიც შენობის ფართობის მატებას იწვევს, შესაბამისად, მნიშვნელობა არ აქვს, ახალი ობიექტი საცხოვრებელს რომელი მხრიდან მიეშენება. მიშენებად არ შეიძლება ჩაითვალოს აივანის ამოშენება და ბინისთვის მიერთება, რომლის ნებართვასაც ასევე არქიტექტურის სამსახური გასცემს. Allnews.ge ასევე დაინტერესდა, ბოლო 5 წლის განმავლობაში, თბილისში რამდენი მიშენების ლეგალიზაცია მოხდა, რისთვისაც ქალაქის მერიას მივმართეთ.
არქიტექტურის სამსახურის ინფორმაციით, 2017 წლის პირველი იანვრიდან, სულ 65 მიშენების ლეგალიზაცია მოხდა, 2016 წელს 257-ის, 2015 წელს 301-ის, 2014 წელს 378-ის, ხოლო 2013 წელს, ყველაზე მეტი, 389 მიშენება დარეგისტრირდა. ლეგალიზაციის ყველაზე მცირე რაოდენობა, 177 ერთეული, 2012 წელს განხორციელდა.
თბილისის მერიის არქიტექტურის სამსახურის ინფორმაციით, მიშენებაზე ლეგალიზაციის გაცემა მხოლოდ შესაბამისი დოკუმენტაციის წარდგენის საფუძველზე ხდება, შესაბამისად, საკითხის შესწავლის გარეშე, უწყება ობიექტის ფლობის ნებართვას არ გასცემს.
რის საფუძველზე და ვინ გასცემს მიშენების ლეგალიზაციაზე ნებართვას?
თუ მრავალსართულიან კორპუსში, მიშენება 2007 წლის 1 იანვრამდე გაქვთ გაკეთებული, თბილისის მერიის არქიტექტურის სამსახურს ნოტარიულად დამოწმებული განცხადებით უნდა მიმართოთ, რომელსაც თან საჯარო რეესტრიდან ბინის ამონაწერს დაურთავთ. ამასთანავე, უწყებას კორპუსის ამხანაგობის კრების ოქმი, მიშენების ლეგალიზაციაზე მათი 100%-იანი თანხმობით უნდა წარუდგინოთ, რომლის ნოტარიულად დამოწმება ასევე აუცილებელია.
ჩამოთვლილის გარდა, ობიექტის მშენებლობის დასრულების დოკუმენტი (ეს შეიძლება იყოს ორთო-ფოტო 2007 წლამდე გადაღებული და ორგანიზაციის ბეჭდით ან/და კორპუსის ამხანაგობის კრების ოქმში დაფიქსირდეს 2007 წლის 1 იანვრამდე მიშენებული ფართის მშენებლობის დასრულება) და არსებული მიშენების ფოტო-სურათები და არქიტექტურული პროექტი გესაჭიროებათ.
იმ შემთხვევაში თუ საცხოვრებელ ბინაზე მიშენების განხორციელებას გეგმავთ, არქიტექტურის სამსახური ასეთ ნებართვას არ გასცემს, შესაბამისად, ობიექტზე სამუშაოების დაწყებით კანონს დაარღვევთ.
"მენაშენეთა ასოციაციის" ხელმძღვანელის, ირაკლი როსტომაშვილის განმარტებით, მიშენების ლეგალიზაციის გაცემისას, აუცილებელია, ობიექტის უსაფრთხოების შესახებ სრული ინფორმაცია გახდეს ცნობილი. მიშენების განხორციელება შესაბამისი სტანდარტების დაცვით შესაძლებელია, თუმცა თბილისში, უკვე დაგეგმარებულ ტერიტორიებზე ეს მიზანშეწონილი არ არის, რადგან ქალაქის იერსახეს ცვლის.
როდესაც ბინებს შორის მანძილი მცირდება და მიშენების განხორციელების შემდეგ, ჩემი ფანჯრით, მეზობლის ფანჯარას მივუახლოვდები, ამით მისი უფლებები ირღვევა.
თბილისი მჭიდროდ დასახლებულია და მიმაჩნია, რომ მიშენებების არსებობა ქალაქში მიზანშეწონილი არ არის.
მიშენებებმა არასწორი ფორმა არ უნდა მიიღოს, მაგალითად, განვითარებულ ქვეყნებში ასეთი სამუშაოები ხშირად ძველი შენობების გამაგრებისთვის ხორციელდება-ხოლმე," - განმარტავს სპეციალისტი.
საკითხი აქტუალური "სახალხო დამცველის" აპარატის განცხადების შემდეგ გახდა, რომელშიც მიშენების გამო, მოქალაქისთვის შექმნილ დისკომფორტზე იყო საუბარი. კერძოდ, მოქალაქემ ომბუდსმენს საჩივრით მიმართა, რომ მისი მეზობლის მიშენება სახლს უჩრდილავდა და ნესტს იწვევდა, რამაც მასა და მის ოჯახის წევრებს ჯანმრთელობის პრობლემები შეუქმნა.
აღსანიშნავია, რომ ობიექტის ლეგალიზაციაზე ნებართვა არქიტექტურის სამსახურს უკვე გაცემული აქვს. რამდენად უსაფრთხოა მიშენებები და ახდენს თუ არა ობიექტების დეტალურად შესწავლას თბილისის მერიის არქიტექტურის სამსახური, ამ საკითხზე სახალხო დამცველის აპარატი მონიტორინგის ჩატარებას გეგმავს.
მარია მენაბდიშვილი