ბოლო ორი თვის განმავლობაში, ქვეწარმავლებთან დაკავშირებით "ცხოველთა მონიტორინგის სააგენტოში" 450-მდე ზარი შევიდა. რეაგირების შედეგად კი ეკიპაჟებმა 200-ზე მეტი გველი დაიჭირეს, - ამის შესახებ Allnews.ge-ს თბილისის მერიის "ცხოველთა მონიტორინგის სამსახურის" უფროსმა თემურ ფხალაძემ განუცხადა.

მისი თქმით, ქვეწარმავლების გავრცელება თბილისში ტემპერატურის მატებასთან ერთად დაიწყო, შესაბამისად, გამოძახებებიც გახშირდა, -

"ქვეწარამვლების აღმოჩენის ფაქტი თბილისის თითქმის ყველა უბანში ფიქსირდება, მათ შორის გლდანში, ორთაჭალის მიმდებარე ტერიტორიაზე, ასევე დიღომში. ეკიპაჟები კი შესაბამისი აღჭურვილობით შემთხვევის ადგილზე მიდიან და შესაბამის სამუშაოებს ატარებენ, თუმცა იმ ტერიტორიის სპეციალური ხსნარით შეწამვლა, სადაც არ გვინდა, რომ გველმა დაიბუდოს, ჩვენც შეგვიძლია. ამ ხსნარების რეალიზაცია თბილისში ბევრ მაღაზიაში ხდება," - განმარტავს ის.

თემურ ფხალაძის თქმით, გადაწყვეტილების თვითნებურად მიღებას შესაძლოა, უარყოფითი შედეგები მოჰყვეს, ამიტომ უმჯობესია, მოსახლეობამ 112-ზე დარეკოს, რის შემდეგაც შესაბამისი ეკიპაჟი შემთხვევის ადგილზე გამოცხადდება.