რუსთაველის გამზირის 5 ნომერში მისულ კინომოყვარულებს ერთ დღესაც, შესაძლოა, კავკასიაში ყველაზე დიდი საბავშვო კომპლექსი დახვდეს. ყოველ შემთხვევაში ამას კინოთეატრ "რუსთაველის" რეკონსტრუქციის პროექტი ითვალისწინებს, რომელზეც მუშაობა უკვე ორი წელია მიმდინარეობს და დასრულებული სახე ჯერ კიდევ არ არსებობს.

რეკონსტრუქციის გეგმა ერთი კინოდარბაზის დატოვებას ითვალისწინებს, რომელიც ძირითადად საბავშვო თემატიკით იქნება დატვირთული. აქვე იქნება საბავშვო მაღაზიები და კვების ობიექტები. ეს ყველაფერი კი მაღალი ხარისხის მომსახურებითა და ტექნოლოგიით იქნება აღჭურვილი. აღნიშნული ინფორმაცია "რუსთაველის" PR მენეჯერმა მაია სიხარულიძემ მოგვაწოდა.

"ხაზგასმით მინდა აღვნიშნო, რომ ეს ყველაფერი ჯერ დამუშავების ფაზაშია და პროექტზე მუშაობის დასრულების ვადები უცნობია. შესაძლოა ახლა მე რასაც გეუბნებით რეკონსტრუქციის პროექტის საბოლოო ვერსიაში რადიკალურად შეცვლილი იყოს, მაგრამ ამ ეტაპზე, სწორედ ამ მიმართულებით მიმდინარეობს მუშაობა"- განაცხადა მაია სიხარულიძემ.