ჩვენ არ ვართ კმაყოფილი გამოძიებით. ერთი თვე გავიდა და სერიოზული შედეგები არ არის, - ამის შესახებ აზერბაიჯანელი ჟურნალისტის, აფგან მუხთარლის მეუღლე ლეილა მუსტაფაევამ საქართველოს პრეზიდენტთან შეხვედრამდე განაცხადა.

"პირველ რიგში, მსურს პირადად გადავუხადო მადლობა საქართველოს პრეზიდენტს იმ პოზიციისთვის, რომელიც მან დაიკავა. საქართველოს პრემიერ-მინისტრი და სახელმწიფოს სხვა წარმომადგენლები იგივე სიტყვებს იმეორებდნენ, რასაც აზერბაიჯანის ხელისუფლება ამბობდა. პრეზიდენტმა მარგველაშვილმა საპირისპირო პოზიცია დაიკავა. ის მოიქცა, როგორც ნამდვილი პრეზიდენტი", - აღნიშნა ლეილა მუსტაფაევამ.

მისი თქმით, "საქართველოს პოლიციას არაფერი წარმოუდგენია, გარდა რამდენიმე ვიდეოჩანაწერისა".

"ჩვენ არ ვართ კმაყოფილი გამოძიებით. ერთი თვე გავიდა და სერიოზული შედეგები არ არის. მათ არ გამოუვლენიათ პირები, ვინც გაიტაცა აფგან მუხთარლი და ვინც გატაცების ბრძანება გასცა. ეს კი ნიშნავს, რომ თავიანთ თავს აფარებენ ხელს. ეს რომ ყოფილიყო პატარა დანაშაულებრივი ჯგუფი, ისინი მათ იმავე დღესვე გამოავლენდნენ. ეს კი ნიშნავს, რომ სახელმწიფოს მოხელეები არიან ჩართულნი ამ საქმეში. ამიტომაც არ სურთ ამ საქმის გამოძიება", - განმარტა მან.

ლეილა მუსტაფაევამ ასევე აღნიშნა, რომ პრეზიდენტ მარგველაშვილს სთხოვს, ყველა ინსტრუმენტი გამოიყენოს, რათა გავლენა მოახდინოს მთავრობაზე და მინისტრებზე და აფგან მუხთარლის საკითხი საქართველოს დღის წესრიგში დარჩეს.