ყველაფერი, რაც ელიავას ბაზრობაზე გაჩენილი ხანძრის შესახებ არის ცნობილი | Allnews.Ge

ელიავას ბაზრობის ე.წ სექტორების ნაწილში, სადაც გუშინ საღამოს ხანძარი განჩნდა, ამჟამად ექსპერტ-კრიმინალისტები მუშაობენ.

ზარალის ოდენობა ჯერჯერობით დათვლილი არ არის, თუმცა დიდუბის გამგებლის, ირმა ზავრიდაშვილის ინფორმაციით, დათვლილია დამწვარი ობიექტების რაოდენობა, რომელიც დაახლოებით, თხუთმეტს შეადგენს. ხანძრის ადგილზე სამართალდამცავები ობიექტების მეპატრონეებს ამ დრომდე არ უშვებენ, შესაბამისად, ისინი მიმდებარე ტერიტორიაზე არიან მობილიზებულები. მოვაჭრეები აცხადებენ, რომ მათი საკუთრება შესაძლოა არა ცეცხლმა, არამედ წყალმა გაანადგურა.

"შეიძლება საერთოდ არაფერი გადარჩენილა, ჩემი მაღაზია რომ იწვოდა, ეს ზუსტად ვიცი.

პირველი სექტორის ერთი ნაწილი და მეორე სექტორის შუა მხარე სრულად დამწვარია. მე ობიექტზე დაახლოებით,  70 000 ლარის პროდუქცია მქონდა," - აღნიშნავს მაღაზიის ერთ-ერთი მეპატრონე. ხანძრის შედეგად დაზარალებულთა ძირითადი ნაწილის თქმით, მათ ობიექტები დაზღვეული ჰქონდათ, ნაწილი კი აცხადებს, რომ დაზღვევით სარგებლობა მას შემდეგ შეწყვიტეს, რაც ელიავას ბაზრობის თბილისის ზღვის ტერიტორიაზე გადატანის შესახებ ინფორმაცია გავრცელდა.

"დაზღვევას ვადა იანვარში გაუვიდა და აღარ განვაახლე, რადგან გავიგე, რომ ბაზრობა თბილისის ზღვაზე გადადიოდა. ახლა ისევ ვაპირებდი დაზღვევის აღდგენას, თუმცა ვერ მოვასწარი," - განმარტავს ერთ-ერთი დაზარალებული, გია სულაქველიძე.

დაზარალებული Allnews.ge-სთან საუბარში ყვება, რომ მისი ინფორმაციით, "ჭერში რაღაც აალდა და დაცვამ ჩაქრობა ვერ მოასწრო. როდესაც შენობა იკეტება,  დაცვა ელექტოგაყვანილობას თიშავს და ღამით ადგილზე მარტო რჩება, თუმცა ცეცხლის გაჩენის შემდეგ, სახანძრო სამსახურს ვინ შეატყობინა, ასეთი დეტალები არ ვიცი," - აღნიშნავს სულაქველიძე.

ობიექტების მეპატრონეები ასევე ყვებიან, რომ სამუშაო საათების დასრულების შემდეგ, საეჭვო არაფერი შეუმჩნევიათ, ხანძრის შესახებ კი ტელევიზიით, დაახლოებით, 9 საათზე შეიტყვეს.

"ადგილზე ღამითვე მოვედი. ხანძარი კი ჩამქრალია, მაგრამ შიგნით არ შევსულვარ და არ ვიცი, დაახლოებით, რამდენი ლარის ზარალი მექნება," - განაცხადა ერთ-ერთმა დაზარალებულმა ლენა ანდღულაძემ Allnews.ge-სთან საუბარში.

რამდენიმე მოვაჭრემ ჟურნალისტებთან საუბარში აღნიშნა, რომ ხანძრის პერიოდში და მას შემდეგ, ტერიტორიაზე დაცვის წევრები არ უნახავთ, შესაბამისად, გასაუბრების საშუალებაც არ მისცემიათ, გარდა ამისა, მათთვის უცნობია, ვინ შეატყობინა ხანძრის შესახებ შესაბამის სამსახურებს.

ბაზრობაზე გაჩენილი ხანძრის შესახებ განცხადებები ელიავას ბაზრობის ნაწილის დირექტორმა, გოჩა ხეცურიანმაც გააკეთა. მისი თქმით, ხანძრის გამომწვევი მიზეზი სწრაფად ვერ გაირკვევა. იქამდე კი, მეპატრონეები თავიანთ მაღაზიებს დაათვალიერებენ და ზარალს დაითვლიან.

"ხანძრის მიზეზებს ექსპერტები დაადგენენ, სავარუდო მიზეზებზე კი ჯერჯერობით, ვერ ვისაუბრებთ," - განაცხადა გოჩა ხეცურიანმა.

დაზარალებულები მიმდებარე ტერიტორიებზე ახლაც არიან და საკუთარი ობიექტების დათვალიერების ნებართვას ელოდებიან. თბილისის ვიცე-მერის, ლაშა აბაშიძის თქმით, დაზარალებულებმა სამუშაო ჯგუფი შექმნეს, რომელიც მერიაში სპეციალურ სამსახურს შეხვდა. შეხვედრა უკვე დასრულდა, თუმცა, ოფიციალურ პირებს შედეგებთან დაკავშირებით, განცხადებები ჯერ არ გაუკეთებიათ.

გარდა ამისა, მერიის ინფორმაციით, ელიავას ბაზრობაზე ხანძრის შედეგად დაზარალებულებს ზარალს ჩამოაწერენ, თავის მხრივ, მაღაზიების მეპატრონეები ზარალის ანაზღაურებას სახელმწიფოს სთხოვენ.

ელიავას ბაზრობაზე ხანძარი გუშინ საღამოს გაჩნდა, რომლის ლიკვიდაციაც მეხანძრეებმა ღამით, დაახლოებით, 3 საათში შეძლეს. ხანძრის შედეგად 2 300 კვადრატული მეტრის ფართობი დაიწვა. მაღაზიების მეპატრონეებს მიყენებული ზარალი ჯერ არ დაუთვლიათ.