ახალგაზრდებმა ღამე სოფელ ბერშუეთის განაპირას კარვებში გაატარეს | Allnews.Ge

საოკუპაციო ხაზის სიახლოვეს მიმდინარე 24-საათიანი აქცია რამდენიმე საათში დასრულდება. ახალგაზრდების ჯგუფი, რომელმაც მთელი ღამე სოფელ ბერშუეთის განაპირას კარვებში გაატარა, ამ დრომდე აქციის ადგილზე იმყოფება.

ცოტა ხნის წინ კი აქციის მონაწილეებს ახალგაზრდების კიდევ ერთი ჯგუფრი შეუერთდა. საოკუპაციო ხაზის სიახლოვეს შეკრებილები აცხადებენ, რომ მცოცავი ოკუპაციის პრობლემა მხოლოდ იმ ადამიანებს არ ეხებათ, ვისი მიწებიც დეფაქტო ხელისუფლების კონტროლირებად ტერიტორიაზე მოექცა. ეს არის მთელი საქართველოს პრობლემა და შესაბამისი რეაქცია ყველამ უნდა დააფიქსიროს", - მიიჩნევენ აქციის მონაწილეები.

სოციალური ქსელის მეშვეობით დაგეგმილი აქციის მონაწილეები ასევე აცხადებენ, რომ სოფელ ბერშუეთთან ორდღიანი შეკრება რამდენიმე გზავნილს ისახავდა მიზნად: სტუდენტები რუსეთის ფედერაციას მოუწოდებენ, შეწყვიტოს ოკუპაცია და საქართველოს ტერიტორიების ანექსია. ისინი დეფაქტო სამხრეთ-ოსეთის ხელმძღვანელობას მიმართავენ, არ წამოეგონ რუსულ პროვოკაციას და ნუ გადადგამენ ისეთ ნაბიჯებს, რაც შემდგომში რთული გამოსასწორებელი იქნება.

საქართველოს ხელისუფლებას კი აქციის მონაწილეები მოუწოდებენ, გადადგას ქმედითი ნაბიჯები, აქტიურად დააფიქსიროს პოზიცია მომხდართან დაკავშირებით და ყველაფერი გააკეთოს იმისთვის, რომ მცოცავი ოკუპაციის თემა საერთაშორისო საზოგადოების აქტიური განხილვის საგანი გახდეს.

ორდღიანი აქციის განმავლობაში არანაირი ინციდენტი არ დაფიქსირებულა. კვლავ ადგილზე რჩებიან პოლიციის ჯგუფები და ტერიტორიას სამართალდამცავები მას შემდეგ დატოვებენ, რაც ბერშუეთთან შეკრებილი ახალგაზრდები დაიშლებიან.