ზუგდიდის საავადმყოფოში განმუხურიდან გუშინ გამთენიისას ჰოსპიტალიზებული ახალგაზრდა გოგონა ამ დრომდე ექიმების მეთვალყურეობის ქვეშ რჩება. ამის შესახებ საავადმყოფოს ადმინისტრაციაში განაცხადეს.

ჰოსპიტალში გუშინ მთელი დღის განმავლობაში კიდევ 5 პაციენტი გადაიყვანეს, რომელთაგან 3-ს სხვადასხვა სიმპტომები აღენიშნებოდა, 2 კი დაუზუსტებელი ნივთიერების ტოქსიკური ეფექტის დიაგნოზით მოათავსეს. ხუთივე მათგანი მალევე გაწერეს.

"თეთრი ხმაურის მოძრაობა" უკანასკნელი დღეების განმავლობაში Gem Fest-ზე ადამიანების ნარკოტიკული საშუალებებიოთ ინტოქსიკაციის შესახებ განცხადებას ავრცელებს. Allnews.ge განცხადებას უცვლელად გთავაზობთ:

მოგესალმებით, ჩვენ იმ წუთიდან, რაც ანაკლიაში ფესტივალზე ნარკოტიკული სუბსტანციის მოხმარებისგან ტრაგიკულად გარდაიცვალა 22 წლის ახალგაზრდა გოგონა და მძიმედ მოიწამლა არერთი მოქალაქე, განსაკუთრებული ყურადღებით ვსწავლობთ, ვაკვირდებით და ვიკვლევთ მოვლენებს. მოძრაობა ამ განცხადების გაკეთებას მოგვიანებით, ვნებათაღელვის ჩაცხრომის შემდეგ ვგეგმავდით, თუმცა სამწუხაროდ ინტოქსიკაციის ფაქტები კვლავაც გრძელდება, ადამიანები დგანან სიცოცხლის მოსპობის რისკის ქვეშ, რაც განგაშის საფუძველს იძლევა.

მოვლენების ლოგიკური ჯაჭვითაც კი, დასტურდება, რომ სახეზე გვაქვს მიზანმიმართული დანაშაული. ჩვენ მომხდარში ღიად ვადანაშაულებთ ძალოვნი უწყებებისა და უსაფრთხოების სამსახურების წარმომადგენლებს, კლანურ ჯგუფებს, რომლებიც წლებია იკვებებიან ადამიანთა განადგურებით, რეპრესიული მექანიზმებით, აკონტროლებენ და წარმართავენ ქვეყანაში მოქმედი ნარკოპოლიტიკის ყველა ასპექტს, მოთხოვნა - მოწოდებას თუ ნივთიერებათა მიმოქცევას.

სამწუხაროდ მათი ძალაუფლება განუზომლად დიდია, ისინი ახდენენ გავლენას პოლიტიკურ გადაწყვეტილებებზე, საკუთარ ძალადობრივ ქმედებებს არგებენ კანონებს, ფლობენ ხალხისგან ნაძარცვ კაპიტალს, ფლობენ ინფორმაციის გავრცელების წყაროებს, რომელთა დახმარებით უკვე მესამე დღეა ცდილობენ საზოგადოებრივი აზრის შეცდომაში შეყვანას და ახორციელებენ წინასწარდაგეგმილ, კარგად მომზადებულ შეტევებს საღ აზრზე.

მათი ქმედებები ემსახურება ერთადერთ რამეს - მოახლოებულ საპარლამენტო განხილვებამდე დეკრიმინალიზაციის იდეისა და მოსალოდნელი საკანონმდებლო ცვლილებების დისკრედიტაციას. ისინი ცდილობენ ლიბერალიზაციისკენ მიმართული სამართლიანი საზოგადოებრივი პროტესტის დასუსტებას, პროტესტის, რომელიც მესამე წელია იბრძვის ჰუმანური ნარკოპოლიტიკისთვის, იბრძვის ნულოვანი ტოლერანრობის პრაქტიკების აღმოფხვრისთვს, იბრძვის უდანაშაულო ადამიანთა პოლიციური სისტემის მძიმე მარწუხებისგან დახსნისთვის და პირდაპირ ეწინააღმდეგება ამ კლანების ინტერესებს.

ჩვენ უკვე წლებია ვსაუბრობთ სისტემაში არსებულ ამ მანკიერებაზე, თუმცა ვიცით, რომ ხელისუფლებაში სიმართლეს ჰყავს მხარდამჭერებიც, მოვუწოდებთ სწორედ მათ, ხელისუფლების იმ ნაწილს, რომელიც სრულად იაზრებს პრობლემის სიმძაფრეს, თქვენ ვალდებულნი ხართ ღიად დაუპირისპირდეთ აღნიშნულ ძალებს და ჩვენთან ერთად დაამარცხოთ ისინი.

მოვუწოდებთ გამოძიებას, სასწრაფოდ დადგინდეს და გასაჯაროვდეს ექსპერტიზის შედეგი, თუ რა ნივთიერებასთან გვაქვს საქმე როგორც გარდაცვლილის ისე მოწამლულთა შემთხვევაში.

ბოლოს კი, განსაკუთრებული სიფრთხილისკენ მოვუწოდებთ ჩვენს მხარდამჭერებსა და ადამიანებს რომლებიც მოიხმარენ ნარკოტიკულ საშუალებებს. ჩვენ ყველანი ვდგავართ სიცოცხლის დაკარგვის რისკის ქვეშ, არ გვაქვს გაუაზრებელი შეცდომების დაშვების უფლება, რადგან ამით დავაზარალებთ არა მხოლოდ საკუთარ თავს, არამედ იმას რისთვისაც ვიბრძვით.

მოერიდეთ უცნობ სუბსტანციებს.

როდესაც ფესტივალის კულმინაციის დროს ჩნდება დაუდგენელი ნივთიერება, რომელმაც უკვე იმსხვერპლა ერთი ადამიანი ხოლო სხვები სიკვდილს ებრძვიან, სინფორმაცია არხებით დაწყებული შეტევები და ნივთიერების სახეობის დამალვა, აჩენს კითხვის ნიშნებს და ლოგიკურ კავშირამდე მივყავართ იმასთან რაზეც ვისაუბრეთ. ჩვენ კონკრეტული სახელების დასახელებისგან თავს ვიკავებთ, რადგან მათი ვინაობა ყველასთვის კარგად ცნობილია.

კიდევ ერთხელ ვუსამძიმრებთ ნათიას ოჯახსა და ახლობლებს, ის არის საქართველოში მოქმედი რეპრესიული ნარკოპოლიტიკის დამცველთა მსხვერპლი.