ამ დროისთვის ლარსის სასაზღვრო გამშვებ პუნქტთან საცობი არ არის. ინფორმაცია ამის შესახებ შინაგან საქმეთა სამინისტრომ მოგვაწოდა. უწყებაში აღნიშნეს, რომ გადატვირთული მოძრაობა ძირითადად ტურისტულ სეზონს უკავშირდება.

მთავრობის სხდომაზე ქვეყნის პრემიერ-მინისტრმა გიორგი კვირიკაშვილმა შინაგან საქმეთა და ჯანდაცვის სამინისტროებს დაავალა, საჭიროების შემთხვევაში ზემო ლარსზე, რიგში მდგომი ადამიანები ყველა საჭირო სერვისით უზრუნველყონ.

"მე რამდენადაც ვიცი, ლარსის გამშვებ პუნქტზე შეფერხებები შეიქმნა ისევ და ისევ ტურისტების გაზრდილი ნაკადის გამო და შეფერხებები შეექმნათ სატვირთო მანქანების მძღოლებს. ვიცი, რომ ზომები მიღებულია მათი სასმელი წყლით და სამედიცინო მომსახურების უზრუნველყოფისთვის. მინდა, შინაგან საქმეთა და ჯანდაცვის სამინისტროებს გთხოვოთ, რომ მაქსიმალურად, ამ მაღალი ტემპერატურის პირობებში, განსაკუთრებული ყურადღება მივაქციოთ იმ ადამიანების მდგომარეობას, რომლებსაც რიგში ლოდინი უწევთ. იქ არ არის განვითარებული ყველა საჭირო ინფრასტრუქტურა, რომელიც სერვისების უზრუნველყოფისთვის არის საჭირო.

ჩვენ უახლოეს პერიოდში გვექნება იქ მოწყობილი ინფრასტრუქტურა და დიდი იმედი მაქვს, რომ ეს პრობლემაც გადაიჭრება. სანამ ეს ინფრასტრუქტურა შეიქმნება, მინდა გთხოვოთ, რომ ყოველდღიურ რეჟიმში უზრუნველყოთ ის სერვისები, რომლებიც ამ ადამიანებს სჭირდებათ", - განაცხადა პრემიერ-მინისტრმა.