ჭონქაძის ქუჩაზე გუშინ მომხდარი მკვლელობის თვითმხილველები ორ ვერსიაზე საუბრობენ. როგორც საუბრისას თვითმხილველებმა განაცხადეს, გარდაცვლილია მთაწმინდაზე, ნიაღვრის ქუჩის მცხოვრები 50 წლამდე ასაკის მამაკაცი. თვითმხილველთა ერთი ნაწილი ამბობს, რომ მკვლელობის დროს მამაკაცთან რამდენიმე პირი იმყოფებოდა, როდესაც ერთ-ერთმა მამაკაცმა სანადირო თოფიდან გაისროლა. ხოლო მეორე ვერსიით, მამაკაცი უცნობმა პირმა მოკლა, რომელიც მოტოციკლით გადაადგილდებოდა. მკვლელობის მომენტში კი მას ჩაფხუტი ეხურა.

თვითმხილველების განცხადებით, მათ რამდენიმე გასროლა გაიგეს. მათივე ინფორმაციით, მამაკაცი რამდენიმე წუთის განმავლობაში ცოცხალი იყო და მის დახმარებას სასწრაფოს მოსვლამდე ჭონქაძის ქუჩის მცხოვრებლები ცდილობდნენ.

მკვლელობა მთაწმინდაზე, ვილნიუსის სკვერში მოხდა, სადაც გამოყოფილია ბავშვებისთვის განკუთვნილი ზონა და საცხოვრებელი კორპუსებია განთავსებული. არსებული ინფორმაციით, სხვადასხვა ობიექტებიდან ვიდეოსათვალთვალო კამერები ამოიღეს და მოქალაქეები გამოკითხეს. გამოძიება 108-ე და 236-ე მუხლებით მიმდინარეობს.