მეხანძრის საშუალო ხელფასი თბილისში 800, რეგიონებში კი – 500 ლარია, - ამის შესახებ გამომძიებელ ჟურნალისტთა გაერთანება ifact.ge-ის სტატიაშია ნათქვამი. სტატია სახელწოდებით, "ვინ ებრძვის ხანძარს და ვინ იღებს მილიონებს?" 2017 წლის 23 აგვისტოს გამოქვეყნდა.

"2017 წლის კრიზისი ხანძარია. მხოლოდ ამ ზაფხულს ქვეყანაში ათზე მეტი ხანძარი გაჩნდა. პარალელურად უკვე სამი წელია ქვეყანაში გვაქვს საბჭო, რომელიც შექმნილია მძიმე პოლიტიკური, სოციალური, ეკონომიკური, ეკოლოგიური და სხვა შედეგების თავიდან ასაცილებლად და აღმოსაფხვრელად. მთავრობამ და საბჭომ კი ცეცხლმოკიდებული ბორჯომის ხეობის საშველად ნაბიჯები ერთი დღის დაგვიანებით გადადგეს და სიტუაცია რეალურად ვერ შეაფასეს. ჩათვალეს, რომ ხანძარი ჩააქრეს, თუმცა ქარიანმა ამინდმა ცეცხლის ახალ-ახალი კერები წარმოშვა და ასე შემოგვეწვა ხელში 15 ჰექტრამდე ტყე." - ნათქვამია სტატიაში.

ბორჯომის ხეობაში ამ დროისთვის ხანძრის ძირითადი კერები ლოკალიზებულია, თუმცა გარკვეულ მონაკვეთებზე კვლავ რჩება მისი გავრცელების საშიშროება, - ამის შესახებ გარემოსა და ბუნებრივი რესურსების დაცვის სამინისტროდან გვაცნობეს, რომელიც ბორჯომის ხეობაში ვითარებასთან დაკავშირებით განცხადებას ავრცელებს.