საქართველოში თბილი ამინდი 21 სექტემბრამდე შენარჩუნდება. როგორც "ინტერპრესნიუსს" გარემოს ეროვნული სააგენტოს მოკლევადიანი პროგნოზების სამმართველოს უფროსმა დოდო გვაზავამ განუცხადა, მომდევნო ერთი კვირის განმავლობაში საქართველოში უმეტესად უნალექო ამინდი იქნება. აღნიშნული განპირობებულია ქვეყნის სამხრეთიდან მოქმედი ცხელი ჰაერის მასებით. ამდენად, მნიშვნელოვანი ტემპერატურული ცვლილებები მოსალოდნელი არ არის.

შავი ზღვის სანაპირო ზოლში დროგამოშვებით შესაძლოა იყოს ცვალებადი მოღრუბლულობა.

დღისით ჰაერის მაქსიმალური ტემპერატურა 26–32 გრადუსი იქნება; დასავლეთ საქართველოს დაბლობში – 32–37 გრადუსი; მთიან რაიონებში – 28 გრადუსამდე; აღმოსავლეთ საქართველოს ბარში – 30–35 გრადუსი, სტეფანწმინდასა და გუდაურში – 24 გრადუსამდე; ბაკურიანში, ახალქალაქსა და წალკაში – 26–30 გრადუსამდე; თბილისში – 33–35 გრადუსი.