ქვემო ფონიჭალაში, დადიანის ქუჩაზე სპეცოპერაცია ამ დრომდე გრძელდება. შინაგან საქმეთა სამინისტროში ადასტურებენ, რომ ნარკოტიკების რეალიზებისთვის ბრალდებულია ერთი მამაკაცი, თუმცა უწყებაში სხვა დამატებით დეტალებზე არ საუბრობენ.

როგორც "ინტერპრესნიუსთან" საუბრისას ბრალდებული მამაკაცის დამ განაცხადა, მის ძმას ჯანმრთელობასთან დაკავშირებით პრობლემები აქვს, წარდგენილ ბრალდებას კი არ ეთანხმება. მისივე თქმით, მის ძმას ნარკოტიკულ საშუალებებთან არანაირი შეხება არ აქვს.

"არ ვიცი, პოლიციელები რატომ მოვიდნენ. მე ცოტა შორს ვცხოვრობ. თავდაპირველად მეგონა, რომ ავარია მოხდა და ამიტომ იმყოფებოდნენ და შემდგომ გავიგე რაც ხდებოდა. ჩემი ძმა ავადმყოფია, მას არანაირი ნარკოტიკები არ აქვს. ის ამ სახლში მარტო ცხოვრობს",- განაცხადა ბრალდებულის დამ.

ადგილზე ასევე იმყოფებიან დადიანის ქუჩაზე მცხოვრები მოქალაქეები, თუმცა ისინი მედიასთან კომენტარს არ აკეთებენ.

აღსანიშნავია, რომ რამდენიმე ქუჩის მოშორებით, გამსახურდიას ქუჩაზე ჩატარდა კიდევ ერთი სპეცოპერაცია, რომლის დროსაც ნარკოტიკების რეალიზების ბრალდებით ერთი პირი დააკავეს.

გუშინ მსგავსი ბრალდებით ასევე დააკავეს კიდევ ერთი პირი, რომლის სახლშიც სამართალდამცველებმა ჩხრეკა აწარმოეს.