მეტროსადგური "უნივერსიტეტის" ტესტირება დასრულებულია და უახლოეს დღეებში გაიხსნება, – ამის შესახებ Allnews.ge-ს საქართველოს მუნიციპალური განვითარების ფონდში განუცხადეს.

თავდაპირველად, "უნივერსიტეტის" სამშენებლო სამუშაოები 2017 წლის მაისის ბოლოს უნდა დასრულებულიყო, თუმცა ვადებმა 20 ივნისამდე გადაიწია. მას შემდეგ კი ახალი მეტროსადგურის ტესტირება მიმდინარეობს.

მუნიციპალური განვითარების ფონდის საზოგადოებასთან ურთიერთობის სამსახურის განმარტებით, ვადების გადაწევის კონკრეტული მიზეზი არ არსებობს. ეს, შესაძლოა, მეტროსადგურის მასშტაბების გამო მოხდა.

"ვადების გადაწევის არანაირი მიზეზი არ არსებობს, ჩვეულებრივად დასრულდა მშენებლობა და შემდეგ მიმდინარეობდა ტესტირება, რომელიც ამდენ ხანს იმიტომ გაგრძელდა, რომ მოგეხსენებათ, მეტროსადგურებში ყველგან ძველი ქსელებია. ახალი ქსელების ადაპტირება და სინქრონიზაცია რომ მოხერხდა, ამხელა ტესტირება ამიტომაც გავაკეთეთ. სატესტო რეჟიმში ჩართული იყო როგორც ჩვენი სატრანსპორტო კომპანია, ისე უცხოელები", – განმარტავენ მუნიციპალური განვითარების ფონდში.

ფონდის ინფორმაციით, ტესტირებამ წარმატებით ჩაიარა და მეტროსადგური ექსპლუატაციაში შესასვლელად უკვე მზადაა.