1 ნოემბრიდან ე.წ ჭკვიანი კამერები თითქმის ყველგან განთავსდება, სადაც ინტენსიური საავტომობილო მოძრაობაა, განსაკუთრებით კი საზოგადოებრივი ტრანსპორტით დატვირთულ მონაკვეთებში, – ამის შესახებ Allnews.ge-ს შინაგან საქმეთა სამინისტროში განუცხადეს.

უწყებაში ასევე განმარტავენ, რომ მძღოლები ავტობუსების სამოძრაო ზოლში (BUS LANE) გადასვლის შემთხვევაში როგორც საპატრულო პოლიციის, ისე ე.წ ჭკვიანი კამერების მიერაც დაჯარიმდებიან, – "ერთ–ერთი მიმართულება იქნება BUS LANE-ში გადასული მძღოლების დაჯარიმება, კამერები ყველა ქუჩაზე დამონტაჟდება, სადაც საპატრულო პოლიცია საჭიროდ ჩათვლის, მათ შორის იმ ქუჩებზე, სადაც საზოგადოებრივი ტრანსპორტი აქტიურად მოძრაობს", – განმარტავენ შსს–ში.

რაც შეეხება უკვე არსებულ კამერებს, ისინი ფუნქციონირებას ისევ გააგრძელებენ.

"ძველი კამერები ისევ იმუშავებს და მათ ახალი ემატება. კამერები, რომლებიც ამჟამად დამონტაჟებულია, მუშაობს, თუ არ ფუნქციონირებს, მათი შეკეთება ხდება ხოლმე. "ჭკვიანი კამერები" უკვე არსებულისგან განსხვავებული იქნება, ეს არის ანალიტიკური სისტემით აღჭურვილი მოწყობილობა, რომელიც დარღვევების ონლაინ რეჟიმში დაფიქსირებას ახდენს", – აღნიშნავენ შსს-ის საზოგადოებასთან ურთიერთობის სამსახურში.

უწყებაში ასევე განმარტავენ, რომ ძველი კამერების მსგავსად, დარღვევების შესახებ ინფორმაცია მძღოლებს მოკლე ტექსტური შეტყობინებით მიუვათ.