მიუხედავად იმისა, რომ უმაღლეს სასწავლებლებში ჩაბარების მსურველთა რიცხვი ყოველთვის მაღალია, დღეს საწარმოები კვალიფიცირებული კადრების სიმცირეს მაინც განიცდიან, რადგან მათ, არამხოლოდ უნივერსიტეტის კურსდამთავრებულები, არამედ პროფესიული განათლების მქონე პირები ესაჭიროებათ.

ამჟამად, საქართველოში 78 ავტორიზებული პროფესიული სასწავლებელი ფუნქციონირებს, მათ შორის 17 სახელმწიფო, 6 სახელმწიფოს წილობრივი დაფინანსებით დაფუძნებული, ხოლო ყველაზე მეტი, 55 კერძო კოლეჯი.

ისინი დაინტერესებულ პირებს, ძირითად შემთხვევებში თითქმის ერთსა და იმავე პროგრამებს სთავაზობენ, თუმცა არსებობს რამდენიმე პროფილური კოლეჯიც, მაგალითად, მუსიკალური, ბიზნესის აკადემია, საექთნო კოლეჯი და ა.შ.

Allnews.ge დაინტერესდა, რა საგანმანათლებლო პროგრამებს გვთავაზობენ პროფესიული სასწავლებლები და რომელი მიმართულებებია პრიორიტეტული, რისთვისაც რამდენიმე მათგანს დავუკავშირდით.

კოლეჯები როგორც საგნობრივ, ისე მოდულურ სწავლებას გთავაზობენ, მათ შორის განსხვავება კი ისაა, რომ საგნობრივი სწავლების შემთხვევაში პროგრამაში ერთი წლის განმავლობაში ერთვებით, მოდულური სწავლება კი მაქსიმუმ 4 თვის განმავლობაში გრძელდება, შესაბამის სერტიფიკატს კი ორივე შემთხვევაში აიღებთ.

პროფესიულ სასწავლებლები მიღებას წელიწადში ორჯერ, შემოდგომასა და გაზაფხულზე აცხადებენ, რისთვისაც ონლაინ-რეგისტრაციას გაივლით ან თუ თქვენ მიერ არჩეული კოლეჯი ამის საშუალებას არ გაძლევთ, მაშინ თავად ადმინისტრაციას მიმართავთ. მომდევნო ეტაპი "შეფასებისა და გამოცდების ეროვნული ცენტრის" მიერ ორგანიზებული ზოგადი უნარ-ჩვევების გამოცდის ჩაბარებაა, შემდეგ კი კონკრეტულ პროფესიულ სასწავლებელში ტესტირებას თქვენ მიერ შერჩეული მიმართულების გათვალისწინებით გაივლით.

კოლეჯებში სწავლა სხვადასხვა დროს იწყება, შესაბამისად, ამის კონკრეტული თარიღი არ არსებობს. რაც შეეხება ყველაზე მოთხოვნად პროგრამებს, სახელმწიფო პროფესიული სასწავლებლების განმარტებით, ყველაზე მეტი სტუდენტი გაზაფხულის სეზონზე ბუღალტერიის, ავტომობილის შემკეთებელ-ელექტროტექნიკოსის, ტანსაცმლის მხატვრული კონსტრუირების, სამკერვალო მიმართულეებსა და კომპიუტერულ პროგრამებზე იყო.

"ასაკი შეზღუდული არ არის, მხოლოდ ქვედა ზღვარია დაწესებული, 9 კლასის განათლება ვისაც აქვს, მას შეუძლია, პროფესიულ განათლებაში ჩაერთოს, უფრო პატარას კი ამის საშუალება არ ეძლევა, ზედა ზღვარი კი დაწესებული არ არის," - განუცხადეს Allnews.ge-ს "გლდანის პროფესიული მომზადების ცენტრში," რომელიც ყოველ სეზონზე 300-მდე სტუდენტს იღებს და 28 მიმართულება აქვს.

ასევე, კოლეჯ "მერმისში" განგვიცხადეს, რომ მიღება 16 წლის ასაკიდან წარმოებს და მიღებას საქართველოში ყველაზე მეტ, 45 მიმართულებაზე აცხადებენ, მათი თქმით კონკურსიც მაღალია, ძირითადი მოთხოვნა კი აქაც ბუღალტერიასა და ოფისის მენეჯმენტზეა.

დაინტერესებულ პირებს, ალბათ ინფორმაციის მიღება დასაქმების პერსპექტივასთან დაკავშირებითაც გსურთ, ამის საშუალებას კი "საქართველოს ფერმერთა ასოციაციისა" და სახელმწიფო პროფესიული კოლეჯების ერთობლივი პროგრამა მოგცემთ. ასოციაციის წარმომადგენლის, ნინო ზამბახიძის თქმით, პროგრამა "შვეიცარიის განვითარების სააგენტოს" მხარდაჭერით უკვე ერთი წელია ხორციელდება და მასში 40 სტუდენტია ჩართული:

"პროექტს საქართველოს რამდენიმე რეგიონში, სამცხე-ჯავახეთში, კახეთში, მცხეთა-მთიანეთსა და სამეგრელოში მეცხოველეობისა და მეხილეობის მიმართულებით ვახორციელებთ, რომლის ფარგლებშიც სტუდენტები თეორიულ სწავლებას პროფესიულ სასწავლებლებში, ხოლო პრაქტიკულს კერძო საწარმოებში გადიან, რომლებიც შემდეგ შერჩევის საფუძველზე რამდენიმე სტუდენტს ასაქმებენ. ამ პროგრამამ პროფესიული სასწავლებლების პოპულარობას ხელი შეუწყო და გაგრძელებას მომავალ წელსაც ვგეგმავთ. ბევრი სტუდენტი ბაკალავრის ხარისხის აღების შემდეგ პროფესიულ სასწავლებელში მოვიდა, რათა მომავალში წარმატებული ბიზნესის დასაწყებად კვალიფიკაცია აემაღლებინა. პროგრამა სტუდენტებს სტიპენდიის მიღების საშუალებასაც აძლევს, რაც მათთვის პრიორიტეტულია," - განმარტავს ის.

რაც შეეხება საქმიანობას, რომელსაც პროგრამაში ჩართული პირები ეწევიან, ნინო ზამბახიძის თქმით, ეს შეიძლება იყოს ცხოველების მოვლა, კვებით უზრუნველყოფა, წველა, - "მეხილეობის შემთხვევაში ისინი სწავლობენ ჩითილის დარგვას, ნერგის დამყნობას, გასხვლას, მოსავლის შენახვას. ჩვენს პროგრამაში ჩასართავად, დაინტერესებულმა პირებმა პროფესიულ სასწავლებლებს უნდა მიმართონ, გაიარონ გასაუბრება, გამოცდა, როგორც ეს საგანმანათლებლო ინსტიტუტებისთვის ხდება და შემდეგ არჩეულ პროგრამაში მოხვდებიან. ჩვენ ვფიქრობთ, რომ საშემოდგომოდ უკვე ონლაინ პლატფორმას შევქმნით, სადაც დაინტერესებულ პირებს ონლაინ რეგისტრაციის გავლა ჩვენს პროგრამაზე შეეძლებათ, შესაბამისად, თავად აირჩევენ, რომელ რეგიონსა და საწარმოში სურთ სწავლის გაგრძელება," - განმარტავს ის.

აღსანიშნავია, რომ სახელმწიფო პროფესიულ სასწავლებლებში სწავლა უფასოა, შესაბამისად, პროგრამებში ჩართვის შემთხვევაში სახელმწიფო თქვენს განათლებას სრულად დააფინანსებს.

მარიამ მენაბდიშვილი