სტრუქტურული ცვლილებების მიხედვით, რომლებიც მთავრობაში ხორციელდება, ეკონომიკის სამინისტროსთან ენერგეტიკის სამინისტრო და გარემოსა და ბუნებრივი რესურსების დაცვის სამინისტროს ბუნებრივი რესურსების მართვის კომპონენტი ერთიანდება, რომელსაც დიმიტრი ქუმსიშვილი უხელმძღვანელებს.

სტრუქტურულმა ცვლილებებმა როგორც ხელისუფლების წარმომადგენლების, ისე სხვადსახვა დარგის სპეციალისტების განსხვავებული შეფასებები გამოიწვია. კერძოდ, "ქართული ოცნების" დეპუტატის, ენერგეტიკოს რევაზ არველაძის თქმით, ენერგეტიკის სამისტროს შენარჩუნება უნდა მოხდეს, რადგან ამ სფეროში ჯერ კიდევ ბევრი პრობლემაა:

"მიმაჩნია, რომ ამის გაკეთება ჯერ ნაადრევია და ეს არ უნდა მოხდეს. საქართველოს ენერგეტიკა ისეთ დონეზე არ არის, რომ თუნდაც თავად აკმაყოფილებდეს მოსახლეობის მოთხოვნილებას ელექტროენერგიაში. ცალკე სამინისტრო სწორედ იმისთვის არის, რომ მხოლოდ ამ საქმეებით იყოს დაკავებული - ეს არის ენერგეტიკული სისტემის განვითარება, იმ ენერგოშემცველების მოწოდების ბევრი პრობლემა, რომელიც სერიოზულ განხილვებს მოითხოვს და დიდი პროფესიონალიზმი და გამოცდილება სჭირდება, თუნდაც ისეთ საკითხზე, როგორიცაა ენერგიის განახლებადი წყაროების არჩევა. ჩვენ გვაქვს ენერგიის განახლებადი წყაროების სამი ძირითადი სახეობა: ჰიდროენერგია, ქარი და მზე. როდესაც არ არის ენერგეტიკის სამინისტრო და არის ეკონომიკის სამინისტრო, რომელიმეს წინ წამოწევა შეიძლება რაღაც სუბიექტური მიზეზებით მოხდეს. ენერტეგიკაში ჯერ კიდევ ბევრი პრობლემაა და ენერგეტიკის სამინისტრო უნდა იყოს შენარჩუნებული - ყოველ შემთხვევაში ვიდრე დაბალანსებული ენერგოსისტემა მაინც არ გვექნება ნორმალური", - განაცხადა არველაძემ.

"ქართული ოცნების" დეპუტატისგან განსხვავებით, ეკონომიკისა და ენერგეტიკის სამინისტროების გაერთიანებაში პრობლემებს ვერ ხედავს ეკონომიკის ექსპერტი სოსო არჩვაძე. მისი განმარტებით, არსებობს საფრთხე, რომ სამინისტროების გაერთიანების გამო გარკვეული მიმართულებების მიმართ ყურადღება მოდუნდეს, თუმცა მისივე თქმით, დიმიტრი ქუმსიშვილის პასუხისმგებლობა, რომელიც ვიცე-პრემიერის პოსტითაც შემოიფარგლება, ამ საფრთხეებს მინიმუმამდე ამცირებს, - "მას ეკონომიკის სფეროს ხელმძღვანელობის გამოცდილება აქვს და პროფესიონალების ის კოლექტივი, ბირთვი, რომელიც ენერგეტიკის სამინისტროში იყო, კარგი შედეგის მისაღწევად იქნება გამოყენებული. არ არის აუცილებელი, ხელმძღვანელი პირი ყველა სფეროსა და მიმართულებაში გარკვეული იყოს," - აღნიშნავს სოსო არჩვაძე.

ეკონომიკის ექსპერტის თქმით, საფრთხე, რომ გარკვეულ მიმართულებებს მთავრობის მხრიდან ნაკლები ყურადღება დაეთმობოდა, სამინისტროების ცალ-ცალკე უწყებებად არსებობის შემთხვევაშიც არსებობდა, - "ანომალია იყო, რომ მაგალითად, ამერიკის შეერთებულ შტატებს ჩვენს სამთავრობო ცვლილებებამდე, დაახლოებით, 1,5-ჯერ ნაკლები ფედერალური სამინისტრო ჰქონდა, ვიდრე საქართველოს, ამიტომ მივესალმები ამ გადაწყვეტილებას და ახლა მთავარია სწორი მენეჯმენტის საფუძველზე უკუგება მაქსიმალურად მაღალი იყოს," - დასძენს არჩვაძე.

სამთავრობო ცვლილებების შესახებ განცხადება საქართველოს პრემიერ-მინისტრმა, გიორგი კვირიკაშვილმა დღეს დილით გააკეთა. აღნიშნული ცვლილებები პარლამენტს განსახილველად უნდა წარედგინოს.