განათლების სამინისტრომ ქუთაისის ერთ-ერთი საჯარო სკოლის მოსწავლის ცემის ფაქტის შესწავლა დაიწყო. სკოლის მოსწავლის მშობელი, თამარ ქემოკლიძე აცხადებს, რომ პირი, რომელმაც მისი შვილი სცემა, მისივე შვილის კლასელის მამაა. თამარ ქემოკლიძის თქმით, ამ ფაქტს ორი დღის წინ მის შვილსა და შვილის თანაკლასელს შორის მცირე კამათი უძღოდა.

მომხდარის შესახებ ინფორმირებულია სკოლის ადმინისტრაციაც, რომელმაც ფაქტი განთლების სამინისტროს აცნობა. სკოლის დირექტორის განცხადებით, საგანმანათლებლო დაწესებულების მიმდებარე ტერიტორიაზე ნამდვილად იმყოფებოდა მისი სკოლის მოსწავლე და ერთ-ერთი მოსწავლის მშობელი, თუმცა, სცემა თუ არა მამაკაცმა ბავშვს, ეს დირექტორისთვის უცნობია.

როგორც თამარ ქემოკლიძემ აღნიშნა, პირი, რომელმაც მისი შვილი სცემა, პოლიციელის ფორმაში იყო ჩაცმული. ამასთან დაკავშირებით, შინაგან საქმეთა სამინისტროში განაცხადეს, რომ აღნიშნული პიროვნება პოლიციელი არ არის. უწყებაში აცხადებენ, რომ საკითხის შესწავლა სამართალდამცველების მიერ კანონშესაბამისად მიმდინარეობს.