საქართველო დაცული ქვეყანაა და არ არსებობს გერმანიაში თავშესაფრის მოთხოვნის არანაირი პირობა, - გერმანიის შინაგან საქმეთა ფედერალური სამინისტროს მიგრანტთა დაბრუნების შტაბის ხელმძღვანელმა, დოქტორმა კრისტიან კლოსიმ საქართველოს საგარეო საქმეთა სამინისტროში გამართული შეხვედრის შემდეგ განაცხადა.

მისი თქმით, თავშესაფრის მთხოვნელები სამშობლოში დაბრუნდებიან.

"ჩვენ საკმაოდ ნაყოფიერი შეხვედრა გვქონდა. ვისაუბრეთ იმაზე, რომ ვიზალიბერალიზაციის შემდეგ, მნიშვნელოვნად არის გაზრდილი გერმანიასა და ევროპაში თავშესაფრის მაძიებელი საქართველოს მოქალაქეების რიცხვი, რაც, რა თქმა უნდა, შემაშფოთებელია. განსაკუთრებული მატება იგრძნობა ბოლო თვეებში. საქართველო დაცული ქვეყანაა და არ არსებობს გერმანიაში თავშესაფრის მოთხოვნის არანაირი პირობა, ამიტომ თავშესაფრის მთხოვნელები დაბრუნებული იქნებიან სამშობლოში. ამ მხრივ თანამშრომლობა უნდა გავააქტიუროთ, რათა სათანადოდ იქნას დაცული, როგორც ევროპული, ისე ქართული კანონი და საქართველოს მოქალაქეებმა თავისუფად ისარგებლონ უვიზოდ მიმოსვლით", - განაცხადა დოქტორმა.

შეგახსენებთ, რომ გერმანიის დელეგაცია საქართველოში ორდღიანი ვიზიტით იმყოფება და დაგეგმილია შეხვედრები უმაღლესი თანამდებობების პირებთან.