ძალიან გადავერთეთ ექიმების უფლებების დაცვაზე, ნაკლებს ვსაუბრობთ პაციენტის უფლებებზე - ექსპერტი | Allnews.Ge

ვფიქრობ, რომ ასე ყველაფრის აკრძალვა, რომ მედიაში არ იყოს საუბარი თუ რა პრობლემებია და პრეტენზიის გამოხატვის საშუალება არ ჰქონდეს ან პაციენტს ან მის ახლობელს, ეს არამგონია სწორი იყოს, - განაცხადა ექსპერტმა ჯანდაცვის საკითხებში, ირაკლი სასანიამ "ინტერპრესნიუსთა" საუბარში "საქართველოს კლინიკების ასოციაციების" საკანონმდებლო წინადადების შეფასებისას. მისი თქმით, ჯანდაცვის სისტემა, პირველ რიგში, პაციენტის ინტერესებსა და საჭიროებებზე უნდა იყოს მორგებული და ამის დეფიციტის ფონზე ექიმების უფლებების დაცვის კიდევ უფრო გამკაცრება არასწორია.

"ვფიქრობ, რომ ყველაფრის ასე აკრძალვა, რომ მედიაში არ იყოს ლაპარაკი თუ რა პრობლემებია და პრეტენზიის გამოხატვის საშუალება არ ჰქონდეს ან პაციენტს ან მის ახლობელს, ეს არამგონია სწორი იყოს. იქ ბევრი პუნქტია, მაგალითად ის, რომ არ ჰქონდეთ აყალმაყალისა და ხმაურის უფლება, მაგრამ თუ პაციენტი უკმაყოფილო იქნება მომსახურებით, თუ გულისხმიერებისა და ყურადღების დეფიციტია, ეს რატომ არ უნდა გაჟღერდეს არ მესმის.

ჯანდაცვის სისტემა და სამედიცინო მომსახურება, პირველ რიგში, პაციენტის ინტერესებსა და საჭიროებებზე უნდა იყოს მორგებული. ჩვენ ძალიან გადავერთეთ ექიმების უფლებების დაცვაზე, ნაკლებს ვსაუბრობთ და ნაკლები ქმედებებია პაციენტების უფლებების დაცვასთან დაკავშირებით. არადა, მთელ ამ სისტემაში მთავარი სწორედ პაციენტია. პირველ რიგში, მოვისმენდი იმას, თუ რა კეთდება პაციენტების უსაფრთხოების უზრუნველყოფისთვის. ამის დეფიციტის ფონზე კიდევ იმის გამკაცრება, რომ ექიმების და სამედიცინო დაწესებულებების უფლებები და ხელშეუხებლობა ისე იყოს გარანტირებული, რომ საერთოდ ინფორმაციაც არ გამოვიდეს თუ რას აკეთებენ, ეს მგონია, რომ ზედმეტია," - განაცხადა ირაკლი სასანიამ.

შეგახსენებთ, რომ არასამთავრობო ორგანზიაცია "საქართველოს კლინიკების ასოციაციამ" პარლამენტში საკანონმდებლო წინადადება წარადგინა, რომლის თანახმადაც, სამედიცინო საქმიანობის დროს ექიმის მიერ დაშვებული გადაცდომის ან ჩადენილი დანაშაულის შესახებ მასმედიის საშუალებით ღიად საუბარი ექსპერტიზის დასკვნის, სამედიცინო საქმიანობაზე ზემდგომი მარეგულირებელი ორგანოს ან სასამართლოს გადაწყვეტილების გარეშე გამოიწვევს მედიასაშუალების დაჯარიმებას 1 000 ლარით, განმეორებით შემთხვევაში კი - თანხა გაორმაგდება.