მეტროს მემანქანეები ხელფასის მომატების მოთხოვნით, გაფიცვას 4 ივნისს აანონსებენ. როგორც Allnews.ge-ის მემანქანეების პროფკავშირის წევრმა არჩილ ლაბაძემ განუმარტა, გამომდინარე იქიდან, რომ სატრანსპორტო კომპანიას არანაირი შეთავაზება არ აქვს დასაქმებულების მიმართ, ისინი გაფიცვას გეგმავენ.

"3 ივნისამდე გვაქვს სასამართლო წესით გადავადება, სწორედ 3 ივნისს გადის ვადა და 4 ივნისიდან ვგეგმავთ გაფიცვას", - განმარტა არჩილ ლაბაძემ.

მეტროს თანამშრომლების ნაწილმა ხელფასების მომატების მოთხონით, გაფიცვა ჯერ კიდევ 2018 წლის 3 მაისს დაანონსეს, თუმცა თბილისის სატრანსპორტო კომპანიის მიმართვის საფუძველზე საქალაქო სასამართლოს მიერ მიღებული გადაწყვეტილებით, გაფიცვა ერთი თვით, 2018 წლის 3 ივნისამდე, გადავადდა. მოგვიანებით, 21 მაისს თბილისის საქალაქო სასამართლომ, "სამუშაო საათების განმავლობაში" პროფესიულ გაერთიანების წევრის მეტროს მემანქანეების გაფიცვაში მონაწილეობის მიღების უფლება განუსაზღვრელი ვადით შეზღუდა.

რომელ სფეროებშია ყველაზე მაღალი მინიმალური ხელფასი თბილისში - იხილეთ ვაკანსიების მონიტორინგის შედეგები

არჩილ ლაბაძის განმარტებით, თბილისის საქალაქო სასამართლომ 21 მაისს უვადო შეზღუდვა გაფიცვაზე დაუწესა მხოლოდ და მხოლოდ მემანქანეებს. ლაბაძის თქმით, სასამართლოს გაფიცვის უფლება არ შეუზღუდავს ერთობა 2013-ის წევრებისთვის, რომლის 80%-ს მემანქანეები წარმოადგენენ, 20%-ს კი სხვა თანამშრომლები:

"მემანქანებიის მთლიანი 100% მიიჩნევს, რომ სასამართლოს გადაწყვეტილება უკანონოდ არის მიღებული, ამიტომ მემანქანეები არ ემორჩილებიან სასამართლოს წესდებას და რა თქმა უნდა, აპირებენ გაფიცვაში მონაწილეობის მიღებას".

არჩილ ლაბაძის განმარტებით, მათი მოთხოვნა სამართლიანი ანაზღაურების მიღებაა.

"მხედველობაში გვაქვს ხელფასის 45%-იანი მატება, რაც დავის დაწყებიდან დავაანონსეთ, რაც გულისხმობს ანაზღაურების, დაახლოებით 300-დან 400 ლარამდე მომატებას მემანქანეებისთის, სხვა თანამშრომლებისთვის ეს კიდევ უფრო დაბალი იქნება. მემანქანის დღევანდელი ანაზღაურება 1100-დან 1200 ლარამდე მერყეობს. ანაზღაურება ნამუშევარ საათებზე არის დამოკიდებული. მემანქანე თვეში 150 საათის განმავლობაში მუშაობს და საათში 6,92 ლარს იღებს ხელფასის სახით. ასევე მოქმედებს დანამატები მემანქანეებისთვის, რომლებიც მძიმე პირობებში მუშაობენ, რაც შეადგენს 55 ლარს და ღამის საათებში მუშაობისთვის ერიცხებათ დამატებით 30-დან 50 ლარამდე. ჩვენი მოთხოვნა სწორედ ეს არის,  რომ 1500-1600 ლარამდე გაიზარდოს მემანქანის ხელფასი", - ამბობს მემანქანეების პროფკავშირის წარმომადგენელი.

თბილისის მეტროპოლიტენის მემანქანეები საათობრივი ანაზღაურების გაზრდას 2 აპრილიდან ითხოვენ. თბილისის მერმა არაერთხელ განაცხადა, რომ მემანქანეებისთვის ხელფასის გაზრდას არ აპირებს.