ზედამხედველობის სამსახურმა კუს ტბის მიმდებარე ტერიტორიაზე სასტუმროს სამშენებლო სამუშაოები შეაჩერა. ადგილზე თბილისის ზედამხედველობის საქალაქო სამსახურის უფროსი გიორგი ბაგრატიონი იმყოფებოდა.

"ჩვენი სამსახურის თანამშრომლები ყოველდღიურად დადიან ქუჩებში. შეამჩნიეს, რომ ამ ტერიტორიაზე რაღაც სახის სამშენებლო სამუშაოები მიმდინარეობდა, ასევე ცხელ ხაზზე შემოვიდა ზარი. შევისწავლით თუ რა ნებართვებია გაცემული, რა სახის მშენებლობაზეა საუბარი და აქედან გამომდინარე, ვიტყვით რა არის დარღვევა და რა - არა", - განაცხადა გიორგი ბაგრატიონმა.

მისივე თქმით, სამუშაოები იქამდე შეჩერდება, ვიდრე ზედამხედველობის სამსახური ყველაფერს არ გამოიკვლევს.

ადგილზე მყოფი კომპანია "არმლენდერ ასოშიეთსის" დირექტორი თეიმურაზ მიქელაძე აცხადებს, რომ აღნიშნულ ტერიტორიაზე თავიდან სპორტული კომპლექსის მშენებლობა იგეგმებოდა, თუმცა, 2006 წელს, ტერიტორიის ნაწილი მერიას გადასცეს და ახლა მხოლოდ სასტუმროს აშენება იგეგმება.

"ტერიტორია კონკურსის წესით 2000 წელს არის შეძენილი. ფართობი მაშინ იყო 6 000 კვადრატული მეტრი, ახლა არის - 2 200. აქ გამიზნული იყო ჩოგბურთის გამაჯანსაღებელი სპორტული ბაზის მშენებლობა. შედგა დასასვენებელი სასტუმროს სახლის პროექტი, რომელიც მერიასთან 2003 წელს შეთანხმდა. 2003 წლის შემდეგ მერიამ მშენებლობის ნებართვის გაცემისგან თავი შეიკავა. ეს საკითხი რამდენჯერმე სასამართლოს მეშვეობით იყო განხილული. მერიას 2003 წელს მშენებლობის ნებართვის გაცემა დაევალა. ეს პროცესი 2015 წლამდე გაგრძელდა და 2015 წელს მერიამ საბოლოოდ გასცა მშებლობის ნებართვა", - განაცხადა თეიმურაზ მიქელაძემ.

მისივე თქმით, 2016 წელს არქიტექტურის სამსახურმა სასამართლოს გადაწყვეტილების საფუძველზე მშენებლობის ნებართვა გასცა.

"ახლა დავიწყეთ მიწის სამუშაოები. ტერიტორიაზე ნარგავი არ ყოფილა, მოსაჭრელი არაფერი იყო, ხეები რომელიც წაქცეულია, ტერიტორიის მიჯნაზე მდგარი ხეებია, რომლებიც თავისით წაიქცა. ორი წელია ეს ხეები წაქცეულია. არ ვიცი, დაავადება აქვს ამ ხეებს თუ რა აქვს, კუს ტბის ტერიტორიაზე წიწვოვანი ხეები ცვივა. შემდეგ მერიამ გაიტანა წაქცეული ხეები და ორი დარჩა", - განაცხადა თეიმურაზ მიქელაძემ.

ადგილზე "პარტიზანი მებაღეების" წარმომადგენელი მარიამ ბაქრაძეც იყოფებოდა. მისი განცხადებით, აღნიშნულ კომპანიას არ აქვს მშენებლობის ნებართვა. მისივე თქმით, კომპანიას არც ესკიზური პროექტი აქვს შეთანხმებული, არც არანაირი პროცედურა არ აქვს გავლილი.

"აღნიშნულ ტერიტორიას დავით ნარმანიას მერობის პერიოდში განსაკუთრებული დაცულობის სტატუსი მიენიჭა და ესეც იმის ნიშანია, რომ აქ არაფერი უნდა აშენდეს", - განაცხადა მარიამ ბაქრაძემ.