ჩვენ გვჭირდებოდა კონკრეტული ტაქტიკა, რათა მოგვეგერიებინა სუს-ის ეს შეტევა, - ასე განმარტა ზვიად კუპრავამ გუშინდელი მისი განცხადება, რომლის მიხედვითაც ის და ზაზა სარალიძე აღარ არიან თანამებრძოლები. კუპრავას თქმით, საბოლოოდ მათმა სტრატეგიამ გაამართლა და სუს-ის გეგმები ჩამოიშალა.

"სუს-ს აქვს ძალიან ორგანიზებული შეტევა ბოლო ორი დღის განმავლობაში ზაზა სარალიძისა და ზვიად კუპრავას წინააღმდეგ. ჩვენ გვჭირდებოდა კონკრეტული ტაქტიკა, რათა მოგვეგერიებინა სუს-ის ეს შეტევა. ჩვენმა სტრატეგიამ გუშინ ჩამოშალა სუს-ის სტრატეგია", - აღნიშნა ზვიად კუპრავამ.

აღნიშნულს ზაზა სარალიძეც გამოეხმაურა. "ზვიად კუპრავასა და ჩემ შორის არაფერი მომხდარა. ეს ილუზია ვის მოუვიდა თავში? - განაცხადა გუშინ პარლამენტის წინ ჟურნალისტებთან საუბარში სარალიძემ.

მისივე თქმით, საზოგადოებრივ მაუწყებელში წასვლას აპირებდა, რათა მიეცა ინტერვიუ იმ ფილმთან დაკავშირებით, რაზეც მანამდე ინფორმაცია გაავრცელა.

"უცებ გამოჩნდნენ ვიღაცები და აპირებდნენ ჩემს წაყვანას, თუ განეიტრალებას. რა უნდოდათ, არ ვიცი. რას აპირებდნენ, ლიკვიდირებას თუ მოტაცებას არ ვიცი", - განაცხადა ზაზა სარალიძემ.