ინციდენტი მოხდა თბილისის საქალაქო სასამართლოს სასადილოში, სადაც ადმინისტრაციული წესით დაკავებული ზვიად კუპრავა პოლიციამ სასამართლოს დარბაზში ძალის გამოყენებით აიყვანა.

ვინაიდან საქმის განხილვა სამ საათამდე გადაიდო, კუპრავა თანამოაზრეებთან ერთად სასადილოში იყო ჩასული, როდესაც მასთან საპატრულო პოლიციის თანამშრომლევი მივიდნენ და დარბაზში ასვლა მოსთხოვეს.

კუპრავამ პოლიციელებს უთხრა, რომ ის დაასრულებდა სადილობას და მალე ავიდოდა, თუმცა ამის საშუალება არ მისცეს და სასამართლო დარბაზში აიყვანეს.

მცირე შეხლა-შემოხლის გამო, სასამართლოს სასადილოს ინვენტარი დაიმტვრა.

შინაგან საქმეთა სამინისტრომ დღეს რუსთაველის გამზირზე 4 პირის დააკავა. როგორც შსს-ს განცხადებაშია აღნიშნული, შინაგან საქმეთა სამინისტროს თანამშრომლების მიერ 11 ივნისს, თბილისში, რუსთაველის გამზირზე პარლამენტის შენობის წინ წვრილმანი ხულიგნობისა და პოლიციელის კანონიერი მოთხოვნისადმი დაუმორჩილებლობის ფაქტზე ადმინისტრაციულ სამართალდარღვევათა კოდექსის 166-ე და 173-ე მუხლებით დაკავებულია 4 პირი: 1983 წელს დაბადებული ლ.ც.; 1983 წელს დაბადებული ზ.კ.; 1995 წელს დაბადებული დ.ჭ. და 1993 წელს დაბადებული ნ.გ.

„შინაგან საქმეთა სამინისტროსთვის, როგორც მართლწესრიგის დაცვაზე პასუხისმგებელი უწყებისთვის, მნიშვნელოვანია, რომ გამოხატვის თავისუფლება იქნეს უზრუნველყოფილი. ამავე დროს სამინისტრო პასუხისმგებელია, რომ შეკრებისა და მანიფესტაციის დროს დაცული იქნეს კანონი, არ შეილახოს მოქალაქეების უფლებები და საფრთხე არ შეექმნას საზოგადოებრივ წესრიგს“, - ნათქვამია განცხადებაში.