შესაძლოა, საქმეში სხვა პირების ინტერესები იკვეთებოდეს, - ამის შესახებ სმიტების ოჯახის სამი წევრის მკვლელობის საქმეზე დაკავებული მწყემსის, მალხაზ კობაურის დედამ, მარიამ მარტიაშვილმა განაცხადა.

დაკავებულის დედას უჭირს ვერსიებზე საუბარი, თუმცა ამბობს, რომ მისი შვილი დამნაშავე არ არის.

"არ ჰქონდა სანადირო თოფი და არ ვიცი, ვის ეკუთვნის ის. მე არ მჯერა, რასაც მას ედავებიან. 7 რიცხვში ვესაუბრე, თუმცა მომხდარზე არაფერი უთქვამს. მე ვიცი, რომ იმ დღეს მწყემსებთან ერთად იყო, მაგრამ ვინ არიან ეს მწყემსები, არ ვიცი. როგორც მაქვს ინფორმაცია, ჩემი შვილი ბრალს არ აღიარებს. ეჭვი მაქვს, რომ ამის უკან ვიღაც დგას. ეჭვი რომელიმე მწყემსზე არ მაქვს, მაგრამ შესაძლოა, სხვა პირი იყოს. ჯერ გამოძიებას და ექსპერტიზის პასუხს ველოდები," - განაცხადა მარიამ მარტიაშვილმა.

როგორ ახასიათებენ სმიტების ოჯახს, რომელიც ხადას ხეობაში მოკლეს

მალხაზ კობაური მზად არის ითანამშრომლოს გამოძიებასთან და მიაწოდოს მის ხელთ არსებული ინფორმაცია, - ამის შესახებ კი სმიტების მკვლელობის საქმეზე დაკავებულ მალხაზ კობაურის ადვოკატმა, ალუდა ბუჩუკურმა ჟურნალისტებთან საუბრისას განაცხადა.

ამასთან, ადვოკატის ინფორმაციით, დაკავებულისთვის ბრალი ამ დრომდე არ წარუდგენიათ.

"ვიმყოფებოდი ჩემი დაცვის ქვეშ მყოფთან და მასთან პოზიცია შევათანხმე. იგი გარკვეულ მნიშვნელოვან ფაქტობრივ გარემოებას ფლობს საქმესთან დაკავშირებით, თუმცა ამ ეტაპზე მისი პოზიციაა, რომ თავს ვიკავებთ საჯაროდ ინფორმაციის გავრცელებისგან. ბრალს არ აღიარებს. ის არ ცნობს თავს დამნაშავედ. მზად არის ითანამშრომლოს გამოძიებასთან და მიაწოდოს მისთვის ცნობილი ინფორმაცია," - განაცხადა ალუდა ბუჩუკურმა.

მისივე ინფორმაციით, დაკავებულს ფიზიკური დაზიანების კვალი ეტყობა, თუმცა როგორ მიიღო დაზიანება, ადვოკატი არ საუბრობს.