საკვებით მოწამვლით 2209 შემთხვევა - კლინიკებისთვის მიმართვიანობის კიდევ უფრო გაზრდას ვარაუდობენ | Allnews.Ge

სავარაუდო დიარეითა და საკვებით მოწამვლით კლინიკებისთვის მიმართვიანობა გაიზარდა, - ამის შესახებ Allnews.ge-ს დაავადებათა კონტროლისა და საზოგადოებრივი ჯანმრთელობის ეროვნული ცენტრის გადამდებ დაავადებათა ეპიდემიოლოგმა, მარინა ლაშქარაშვილმა განუცხადა.

ეპიდემიოლოგის ინფორმაციით, მაისში სავარაუდო დიარეის 1005, ხოლო საკვებით მოწამვლის 2065 შემთხვევა დაფიქსირდა, ივნისში კი კლინიკებისთვის აღნიშნული ჩვენებებით მიმართვიანობამ კიდევ უფრო იმატა და დიარეის 1119 შემთხვევა, ხოლო საკვებით მოწამვლით მიმართვიანობის 2209 შემთხვევა აღირიცხა.

მარინა ლაშქარაშვილი ვარაუდობს, რომ ჰაერის ტემპერატურის ზრდასთან ერთად, შესაძლოა, დიარეისა და საკვებით მოწამლის შემთხვევები კიდევ უფრო გახშირდეს.

"ზაფხულის პერიოდში ძირითადად, მაინც საკვებით გადაცემადი დაავადებები გვხვდება, თუმცა მათი გადაცემა საყოფაცხოვრებო-საკონტაქტო მექანიზმითაც ხდება. ესე იგი საკვებისმიერ დაავადებებსა და სავარაუდო ინფექციით წარმოშობილ დიარეებს მხოლოდ ერთი გადაცემის გზა არ აქვთ, არამედ პათოგენები ადამიანის ორგანიზმში შეიძლება რამდენიმე გზით შეიჭრას, როგორც საკვებით, ისე სასმელი წყლითა და საყოფაცხოვრებო-საკონტაქტო გზითაც. ამიტომ გვჭირდება თავდაცვა, რომ ეს დაავადებები თავიდან ავიცილოთ", - განმარტა ეპიდემიოლოგმა.

მარინა ლაშქარაშვილის რეკომენდაციით, საკვებით მოწამვლის ან დიარეის პრობლემის თავიდან აცილების მიზნით, საკვების შეძენისას, შენახვისა და მომზადების დროს დიდი სიფრთხილის გამოჩენა უნდა მოხდეს.

ცხელი კერძის ოთახის ტემპერატურაზე გაცივება არ შეიძლება - სურსათის ტექნოლოგის რჩევები ხორცთან დაკავშირებით

"უნდა შევიძინოთ პროდუქტი, რომელსაც ვარგისიანობის ვადა აქვს დაცული, თავი უნდა შევიკავოთ გარეთ კვებისგან, რადგან მაღალი ტემპერატურაა და არ არის გამორიცხული, რომ მოვიწამლოთ, კარგად უნდა მოხდეს საკვების თერმულად დამუშავება და უკვე დამუშავებული საკვების სამზარეულოში სწორად შენახვა. რა თქმა უნდა, უნდა დავიცვათ ხელების ჰიგიენა", - განმარტა მან.