თბილისში, ნანგრევების ქვეშ სამი მოზარდი მოჰყვა, რომლებმაც სხეულის სხვადასხვა სახის დაზიანებები მიიღეს. არსებული ინფორმაციით, შემთხვევა ცოტა ხნის წინ, ე.წ ზეემკას დასახლებაში მოხდა.

ასევე, არსებული ინფორმაციით, დაშავებული სამი ბავშვიდან ერთის ჯანმრთელობის მდგომარეობა შედარებით მძიმეა. როგორც "ინტერპრესნიუსს" ჯანდაცვის სამინისტროში განუცხადეს, დაშავებულებიდან 2 ბავშვი ინგოროყვას კლინიკაშია მოთავსებული, ერთი კი მოსკოვის პროსპექტზე მდებარე რეგიონულ საავადმყოფოში გადაიყვანეს.

დაშავებულ მოზარდებს ჯანდაცვის მინისტრი დავით სერგეენკო მოინახულებს.

შინაგან საქმეთა სამინისტრო ნანგრევებში მოზარდების მოყოლასთან დაკავშირებით განცხადებას ავრცელებს. როგორც სამინისტროს განცხადებაშია ნათქვამი, გარდაბნის გზატკეცილზე, 101 კორპუსის მიმდებარე ტერიტორიაზე, სავარაუდოდ ძველი ავტოფარეხის ჩამონგრევის დროს, ნანგრევებში მოჰყვნენ 2004 წელს დაბადებული ზ.ხ., 2003 წელს დაბადებული გ.მ. და 2010 წელს დაბადებული ნ.ქ. სამივე არასრულწლოვანი სამედიცინო დაწესებულებაშია გადაყვანილი.

სამინისტროს ინფორმაციით, ერთ-ერთი დაშავებული კრიტიკულ მდგომარეობაში, ხელოვნურ მართვით სუნთქვაზე იმყოფება. დანარჩენი ორი არასრულწლოვნის ჯანმრთელობის მდგომარეობა სტაბილურია.

"აღნიშნულზე შინაგან საქმეთა სამინისტრომ გამოძიება სისხლის სამართლის კოდექსის 240-ე მუხლის პირველი ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს", - ნათქვამია ინფორმაციაში.