სკოლის მოსწავლეების 48%-ს აქვს შეხება აზარტულ თამაშებთან, - ამის შესახებ არასამთავრობო ორგანიზაცია „აზარტული თამაშების კვლევისა და ლუდომანიის პრევენციის ცენტრის” დამფუძნებელმა გუგა ბესელიამ პრესკონფერენციაზე განაცხადა, სადაც მათ მიერ ჩატარებულ კვლევაზე ისაუბრა.

მისი თქმით, კვლევა თბილისის სხვადასხვა უბნის 10 სკოლაში ჩატარდა და შედეგები საკმაოდ მძიმეა.

„სკოლის მოსწავლეების 48%-ს აქვს შეხება აზარტულ თამაშებთან, მიუხედავად იმისა, რომ კანონი გვიკრძალავს 18 წლამდე მოზარდებისთვის აზარტულ თამაშებთან შეხებას. გამოკითხვაში მიიღო მონაწილეობა 500-მა მოსწავლემ, 55% - ბიჭი, 45% - გოგო. გამოიკითხნენ 14-იდან 18 წლამდე მოზარდები. ასაკის მატებასთან ერთად იზრდება დამოკიდებულება თამაშების მიმართ”, - განაცხადა გუგა ბესელიამ.

როგორც მან აღნიშნა, გამოკითხვის თანახმად, მოზარდები ინფორმაციას ყველაზე ხშირად იგებენ ინტერნეტ-რეკლამით და ეს ციფრი 75 % -ს შეადგენს.