1-ელი ივლისიდან თბილისის მეტროს მუშაობის საათები მცირდება | Allnews.Ge

1-ელი ივლისიდან თბილისის მეტროს მუშაობის საათები მცირდება. ამის მიზეზი დაგეგმილი სამუშაოებია. თბილისის მერის, კახა კალაძის განაცხადებით, 1-ელი ივლისიდან მეტროში ახალი კაბელების საინსტალაციო სამუშაოები დაიწყება. მისი ინფორმაციით, მეტროს რეაბილიტაციის პროექტი კაბელების შეცვლასთან ერთად, ასევე, ითვალისწინებს 28 საგვირაბე გამნიავებლისა და 32 ახალი, ევროპული სტანდარტის ვენტილატორების მონტაჟს. აღნიშნული პროექტის განსახორციელებლად აზიის განვითარების ბანკის მიერ 15 მილიონი დოლარია გამოყოფილი.

დაგეგმილი სამუშაოების გამო, 1 ივლისიდან მეტრო 06:00 საათიდან 23:00 საათამდე იმუშავებს.

„ახალი კაბელების საინსტალაციო სამუშაოები დაიწყება 1 ივლისს, 2020 წლის ივლისში კი მთლიანად დამთავრდება ეს სამუშაოები. ამ პროექტის განხორციელების დროს, ჩვენ მოგვიწევს გარკვეული შეზღუდვების დაწესება, იმიტომ, რომ კომპანიას და იქ მომუშავე ადამიანებს მიეცეთ შესაძლებლობა, ნორმალურ პირობებში იმუშაონ. შესაბამისად, მეტრო 1 ივლისიდან დილის 06:00 საათიდან საღამოს 23:00 საათამდე იმუშავებს და ჩემი თხოვნა სატრანსპორტო კომპანიასთან იქნება, რომ ეს ინფორმაცია მივაწოდოთ მოსახლეობას,“ - განაცხადა კახა კალაძემ.

ამდროისთვის მეტრო 06:00 საათიდან 24:00 საათამდე მუშაობს.