"ახლა, როდესაც ბირთვულ იარაღს ვფლობთ და შეგვიძლია ამერიკის შეერთებული შტატებისგან თავი დავიცვათ, ნებისმიერ პროვოკაციას მცირედი ყოყმანის გარეშე, ატომური თავდასხმით ვუპასუხებთ და მოვიპოვებთ გამარჯვებას ვაშინგტონთან ბრძოლაში"- ეს ჩრდილოეთ კორეის შინაგან საქმეთა სამნისტროს ერთ-ერთი უკანასკნელი განცხადებაა.

ფხენიანსა და ვაშინგტონს შორის ბოლო პერიოდში ვითარება მკვეთრად დაიძაბა, ამის მიზეზი კი ჩრდილოეთ კორეის მიერ, ბალისტიკური რაკეტების პერმანენტული გამოცდა და ბირთვული პროგრამის განვითარებაა.

ამერიკის შეერთებულმა შტატებმა ჩრდილოეთ კორეის საზღვრებისკენ ავიამზიდი "კარლ ვინსონი" კიდევ ერთხელ მიმართა. შეგახსენებთ, რომ აღნიშნული ავიამზიდი ერთ-ერთი ყველაზე დიდია ვაშინგტონის საზღვაო ძალების შემადგენლობაში.

საპასუხოდ, ოფიციალურმა ფხენიანმა განაცხადა, რომ "კარლ ვინსონს" მხოლოდ ერთი დარტყმით ჩაძირავს. ამის საილუსტრაციოდ ჩრდილოეთ კორეაში ქვეყნის "მუდმივი პრეზიდენტისა" და კიმ ჩენ ინის ბაბუის, კიმ ირ სენის, დაბადების დღის 105-ე წლისთავის აღსანიშნავად გამართულ აღლუმზე, ბალისტიკური რაკეტა მილიონობით მაყურებელს შორის საზეიმოდ ჩაატარა.

თავის მხრივ, პენტაგონმა დონალდ ტრამპის ბრძანებით, ავღანეთში ტერორისტული დაჯგუფება, "ისლამური სახელმწიფოს" პოზიციების გასანადგურებლად "ყველა ბომბის დედა" გამოიყენა, რაშიც საერთაშორისო ექსპერტებმა ჩრდილოეთ კორეისკენ მიმართული მკაცრი შეტყობინება ამოიცნეს.

დონალდ ტრამპმა დაძაბულ ვითარებასთან დაკავშირებით, არც სიტყვიერი გაფრთხილება დაიშურა და განაცხადა, რომ თუ ჩინეთი თავის ეკონომიკურ მოკავშირესთან პრობლემას ვერ მოაგვარებს, ამერიკის შეერთებული შტატები საკითხს საკუთარი შეხედულებით გაუმკლავდება.

იმ დროს, როდესაც უკიდურესი დასავლეთიდან და აღმოსავლეთიდან "მუშტის ქნევა" აქტიურ ფაზაში შედის, ისმის ლეგიტიმური კითხვა: შეძლებს თუ არა დონალდ ტრამპი ჩვეული რადიკალური ნაბიჯის გადადგმას კომუნისტური კორეის წინააღმდეგ?

აშშ-ის შეიარაღებული ძალების სპეცსამსახურის ყოფილი პოლკოვნიკის, დევიდ მაქსველის, თქმით, ვაშინგტონის განკარგულებაში უფრო ძლევამოსილი იარაღიც არის, რომელიც Massive Ordnance Penetrator -ის იგივე MOP-ის სახელითაა ცნობილი და მიწის ქვეშ განთავსებული სამხედრო არსენალის წინააღმდეგაა მიმართული. ერთ-ერთი მათგანი კი პირდაპირ ჩრდილოეთ კორეის მიწისქვეშა არსენალის გასანადგურებლადაა მიმართული.

ამავდროულად, კიდევ ერთი კითხვა ჩნედება: არის თუ არა შესაძლებელი, რომ ფხენიანის წინააღმდეგ მიმართული სამხედრო ოპერაცია კატასტროფული საპასუხო რეაქციის გარეშე დასრულდეს?

მაქსველი განმარტავს, რომ თუ კიმების რეჟიმი მისი არსებობის საწინააღმდეგოდ მიმართულ საფრთხეს იგრძნობს, ბირთვულ იარაღს აუცილებლად გამოიყენებს.

"ისინი ვერ მოიგებენ ომს სამხრეთ კორეისა და ამერიკის წინააღმდეგ, თუმცა ჩათვლიან, რომ ერთადერთი არჩევანი ჰქონდათ და ეს ატომური იარაღის გამოყენება იყო".

ამასთანავე, ამერიკის შეერთებული შტატების სტრატეგიული პარტნიორების ინტერესების დაცვის მიზნით, ვაშინგტონი საპასუხოდ ბირთვული იარაღის გამოყენებისგან სავარაუდოდ თავს შეიკავს, თუმცა თეთრი სახლისგან სახმელეთო სამხედრო ინტერვენციაც ნაკლებმოსალოდნელია.

ნებისმიერ შემთხვევაში, სამხედრო კონფლიქტი კომუნისტურ კორეასთან, კაპიტალისტური კორეის დიდ მსხვერპლს მოითხოვს. დაძაბულობის მშვიდობიანად მოსაგვარებლად და ბირთვული არსენალისგან დაცლილი კონტინენტის შესაქმნელად, დასავლეთს რეგიონში არსებული მოკავშირეებისა და მათი სანქციების იმედი აქვს. მათ რიცხვში ეკონომიკური შეზღუდვები, ცდების ჩატარებაზე უარის თქმის სანაცვლოდ, პოლიტიკური კომპრომისები და მშვიდობიანი მოლაპარაკებაა.

ვაშინგტონი ვერ გარისკავს - მიუხედავად იმისა, რომ ამ დრომდე, დადასტურებული არ არის, მართლა ფლობს თუ არა ფხენიანი ბირთვულ იარაღს. მსოფლიოში არ მოიძებნება დაზვერვის არც ერთი თანამშრომელი, რომელიც აღნიშნულ ვარაუდს გაამყარებს და იტყვის რაზეა წამსვლელი კიმ ჩენ ინი.